কেঁচা চাহপাতৰ অভাৱনীয় মূল্য হ্ৰাস পোৱাত চিন্তিত ক্ষুদ্ৰ চাহ খেতিয়ক।ক্ৰমহ্ৰাসমান মূল্যৰ সন্দৰ্ভত ক্ষেত্ৰভিত্তিক অধ্যয়নৰ বাবে চাহ ব'ৰ্ডক নিৰ্দেশনা চৰাইদেউ জিলা উপায়ুক্তৰ।ক্ষুদ্ৰ চাহ খেতিয়ক সকলক মাধমাৰ সোধাই চৰাইদেউ জিলাৰ বট-লিফ ফেক্টৰীৰ মালিকসমূহে অভাৱনীয় হাৰত কেঁচা চাহপাতৰ মূল্য হ্ৰাস কৰাত ক্ষোভ প্ৰকাশ হৈছে চাহ খেতিয়ক সকলৰ মাজত। পুঁজিপতি বনিকগোষ্ঠীয়ে অধিক মুনাফা লাভৰ উদ্দেশ্যে নিৰ্ধাৰিত মূল্যৰ সলনি কেঁচা পাতৰ মূল্য হ্ৰাস কৰাত এতিয়া সংকটৰ সন্মুখীন হৈছে ক্ষুদ্ৰ চাহ খেতিয়ক সকল। উল্লেখ্য যে ৪০ শতাংশ গুণৰ বাবে প্ৰতিকেজি চাহপাতৰ মূল্য ২৭ টকা নিৰ্ধাৰণ কৰা হৈছিল যদিও জিলাখনৰ অধিকাংশ ফেক্টৰীৰ মালিকে এই নিৰ্দেশনা মানি চলা পৰিলক্ষিত হোৱা নাই। যাৰ ফলত চাহ খেতিৰ জৰিয়তে জীৱিকা নিৰ্বাহ কৰা খেতিয়কসকলে এই সংকটৰ পৰা পৰিত্ৰাণ পাবলৈ চৰকাৰৰ হস্তক্ষেপ বিচাৰিছে। ইফালে সোমবাৰে চৰাইদেউ জিলা উপায়ুক্তৰ অধ্যক্ষতাত অনুষ্ঠিত জিলা কেঁচা চাহপাতৰ মূল্য নিৰীক্ষণ সমিতিৰ বৈঠকৰ পাছত সমগ্ৰ বিষয়টো সন্দৰ্ভত ক্ষেত্ৰভিত্তিক অধ্যয়ন কৰি প্ৰতিবেদন দাখিল কৰিবলৈ চাহ ব'ৰ্ডক নিৰ্দেশনা দিয়া হৈছে বুলি জানিব পৰা গৈছে।