পূব গুৱাহাটী আৰক্ষী বিভাগ (ইজিপিডি)ৰ এটা দলে বুধবাৰে যোৰাবাট অঞ্চলৰ পৰা অবৈধভাৱে গৰু-ম’হ সৰবৰাহ কৰাৰ অপৰাধত দুজন লোকক গ্ৰেপ্তাৰ কৰে।
আৰক্ষীয়ে টুইটযোগে জনোৱা মতে, বশিষ্ঠ থানাৰ যোৰাবাট আউট প’ষ্টৰ ইজিপিডিৰ দলে যোৰাবাটত AS01EC6384 নম্বৰৰ এখন টাটা ৪০৭ ট্ৰাক জব্দ কৰে।
মৰিগাঁৱৰ পৰা বৰ্ণীহাটলৈ ১৪টা গৰু সৰবৰাহ কৰিবলৈ গৈ থকাৰ সময়তে ট্ৰাকখন আৰক্ষীৰ হাতত ধৰা পৰে।
অভিযান কালত আৰক্ষীয়ে ট্ৰাকখনত থকা দুজন লোকক গ্ৰেপ্তাৰ কৰে।
গ্ৰেপ্তাৰ হোৱা লোক দুজন লাডেন আলী আৰু মহিদুল আলী বুলি চিনাক্ত কৰা হৈছে। গ্ৰেপ্তাৰ হোৱা দুয়োজন মৰিগাঁৱৰ মিকিৰভাটাৰ বাসিন্দা।
