ગીર સોમનાથના દરિયાકાંઠા વિસ્તારમાં તણાઈ આવેલા ચરસના પેકેટો બિનવારસુ હાલતમાં મળી આવતા પોલીસે જપ્ત કરી કાર્યવાહી હાથ ધરી હતી. જેમાં જિલ્લાના દરીયાકાંઠા વિસ્તારમાં રહેતા અમુક ઈસમોને પણ મળી આવતા લાખો કમાવવાની લાલચમાં ચરસના પેકેટોનો પોતાના ઘરમાં સંગ્રહ કર્યો હોવાની પુષ્ટી થોડા દિવસો પહેલા પોલીસે પાડેલા દરોડા સમયે થઈ હતી. દરમ્યાન બાતમીના આધારે એસઓજીની ટીમે વેરાવળના ખારવાવાડ વિસ્તારમાંથી એક યુવકને તેના ઘરમાં છુપાવેલ પાંચ કિલ્લો ચરસના જથ્થાના 5 પેકેટો સાથે ઝડપી લઈ NDPS એકટ હેઠળ ગુનો નોંધી ધોરણસરની કાર્યવાહી હાથ ધરી છે. આમ, છેલ્લા દોઢેક માસમાં જિલ્લામાંથી સ્પેશિયલ ઓપરેશન ગ્રુપની ટીમએ પાંચમી વખત ચરસનો જથ્થો ઝડપી પાડયો છે.