गुन्हे शाखा आणि अन्न आणि औषध प्रशासनाने (एफडीए) शरीरसौष्ठवासाठी वापरल्या जाणाऱ्या इंजेक्शनची बेकायदा विक्री केल्या प्रकरणी एकावर गुन्हा दाखल केला. शंकरशेठ रस्त्यावर ही कारवाई करीत पावणेदोन लाख रुपयांची इंजेक्शन जप्त करण्यात आली. अमृत पंडीत चौधरी (वय ३०, रा. केशवनगर, मुंढवा) असे गुन्हा दाखल करण्यात आलेल्याचे नाव आहे. याप्रकरणी एफडीएच्या ओैषध निरीक्षक शामल महिंद्रकर यांनी स्वारगेट पोलीस ठाण्यात फिर्याद दिली आहे. शरीरसौष्ठवपटू डॅाक्टरांच्या सल्ल्याने या इंजेक्शनचा वापर करतात. चौधरी या इंजेक्शनची बेकायदा विक्री करत असल्याची माहिती गुन्हे शाखेच्या युनिट दोनला मिळाली. त्यानंतर पोलिसांनी सापळा लावून चौधरीला ताब्यात घेतले. त्याच्याकडून एक लाख ७० हजार ३०५ रुपयांची इंजेक्शन जप्त करण्यात आली.