ক্ৰীড়াৰ প্ৰাণকেন্দ্ৰলৈ পৰিণত হোৱা  ধনশিৰি মহকুমাত  আজি  অলিম্পিক পদক জয়ী  লাভলীনা বৰগোহাঁইৰ নামেৰে এখন  বক্সিং একাডেমীৰ  শুভ উদ্বোধন কৰা হয়।  মহকুমাটোৰ বৰপথাৰ নগৰত  অ' এন জি চিৰ অৰ্থ সাহাৰ্য্যৰে নিৰ্মাণ কৰা হৈছে লাভলীনা বৰগোহাঁই বক্সিং একাডেমী। শনিবাৰে  শুভ উদ্বোধনী অনুষ্ঠানত স্থানীয় বিধায়ক বিশ্বজিৎ ফুকনৰ লগতে  উপস্থিত থাকে  অ' এন জি চিৰ অসম তথা অসম আৰাকান বেচিনৰ কাৰ্যবাহী সঞ্চালক আৰু বেচিন মেনেজাৰ
 সুষমা ৰাৱট। ইপিনে ধনশিৰি জিলা ক্ৰীড়া সন্থাৰ উদ্যোগত অনুষ্ঠিত উদ্ধোধনী অনুষ্ঠানত ধনশিৰি মহকুমাধিপতি দিনছেংফা বৰুৱা, মহকুমা আৰক্ষী বিষয়া ত্ৰিনয়ন ভূঞা  আৰু বক্সাৰ গৰাকীৰ পিতৃ টিকেন বৰগোঁহাইও উপস্থিত থাকে। আজিৰ এই অনুষ্ঠানত লাভলীনা বৰগোহাঁই বক্সিং একাডেমীৰ শুভ উদ্বোধন কৰে অ এন জি চিৰ বেচিন মেনেজাৰ সুষমা ৰাৱটে। বক্সাৰ গৰাকীৰ নামত নিৰ্মিত বক্সিং একাডেমীয়ে খেলুৱৈ সকলে ভূগি অহা দীৰ্ঘদিনিয়া সমস্যা দূৰ কৰিব বুলি সকলোৱে আশা প্ৰকাশ কৰিছে। আনহাতে বিধায়ক বিশ্বজিৎ ফুকনে সাংবাদিকৰ আগত  সৰুপথাৰত ক্ৰীড়াৰ ক্ষেত্ৰত আজি এক নতুন দিগন্তৰ সূচনা হ’ল বুলি মত প্ৰকাশ কৰাৰ লগতে এই একাডেমীয়ে ধনশিৰি মহকুমাক  অসমৰ ক্ৰীড়াৰ ৰাজধানী কৰাৰ দিশত আৰু এখোজ আগুৱাই নিলে বুলি তাৎপয্যপূৰ্ণ মন্তব্য কৰে।