कन्नड : प्रधानमंत्री घरकुल आवास योजनेत शहरी भागातील लाभार्थ्यांना वेगळे , तर ग्रामीण भागातील लाभार्थ्यांना कमी अनुदान असा ग्रामीण व शहरी भेदभाव न करता , केंद्र सरकारने सरसगट पाच लाख रुपये अनुदान द्यावे , अशी मागणी शिवसेना नेते तथा जि . प . चे माजी अध्यक्ष डॉ . आण्णा शिंदे , अंधानेर सरपंच अशोक दापके , सोपान गोलाईत यांनी केंद्रीय मंत्री डॉ . भागवत कराड यांच्याकडे निवेदनाद्वारे केली आहे . घर बांधण्यासाठी लागणाऱ्या लोखंड , वाळू , सिमेंट , बांधकाम मजुरी इतर सर्वच साहित्याचे दर गगनाला भिडले असून , शहरी भागासाठी अडीच लाख तर ग्रामीण भागासाठी एक लाख वीस हजार रुपये इतकेच अनुदान लाभार्थ्यांना मिळते . घर बांधण्यासाठी जो खर्च शहरी भागात लागतो , तोच खर्च ग्रामीण भागातही लागत असल्याने प्रधानमंत्री आवास योजनेद्वारे दिल्या जाणाऱ्या कमी अनुदानाने ग्रामीण भागाच्या लाभार्थ्यांवर अन्याय होत आहे . यामुळे ग्रामीण व शहरी असा भेदभाव न करता सरसगट पाच लाख रुपये अनुदान घरकुलासाठी देण्याची मागणी डॉ . आण्णा शिंदे यांनी केली आहे . यासंदर्भात केंद्रीय मंत्री डॉ . भागवत कराड यांना निवेदन देण्यात आले . यावेळी भाजपचे जिल्हा उपाध्यक्ष संजय खंबायते , सरपंच अशोक दापके आदी उपस्थित होते