এয়া যেন বিনামেঘে বজ্ৰপাত৷ বিজেপি বা কোনো শক্তিশালী বিৰোধীৰ ষড়যন্ত্ৰ অবিহনে পতন ঘটিবলৈ আগবাঢ়িছে ৰাজস্থানৰ কংগ্ৰেছ চৰকাৰ৷ কংগ্ৰেছৰ সৰ্বভাৰতীয় সভাপতিৰ নিৰ্বাচনক কেন্দ্ৰ কৰি সৃষ্টি হোৱা পৰিস্থিতিৰ ফলত অশোক গেহলট নেতৃত্বাধীন ৰাজস্থান চৰকাৰৰ যিকোনো মুহূৰ্ততে পতন ঘটাৰ আশংকাৰ সৃষ্টি হৈছে৷ কিয়নো অশোক গেহলটক একেলগে কংগ্ৰেছৰ সভাপতি আৰু ৰাজস্থানৰ মুখ্যমন্ত্ৰীৰ পদত অধিষ্ঠিত কৰি ৰখাৰ দাবীত কংগ্ৰেছ হাই কমাণ্ডক সৈমান কৰিব নোৱাৰি গেহলটপন্থী ৯২জন বিধায়কে পদত্যাগ কৰিছে৷ তেওঁলোকে ইতিমধ্যে বিধানসভাৰ অধ্যক্ষ চি পি যোশীৰ হাতত দাখিল কৰিছে পদত্যাগপত্ৰ৷ কংগ্ৰেছ হাইকমাণ্ডে বিচাৰিছিল, যদিহে অশোক গেহলট কংগ্ৰেছৰ ৰাষ্ট˜ীয় সভাপতি পদত অধিষ্ঠিত হয় তেন্তে ‘এক ব্যক্তি, এক পদ’ নীতিৰ আধাৰত গেহলটে মুখ্যমন্ত্ৰিত্ব ত্যাগ কৰক আৰু তেওঁৰ স্থানত যুৱ নেতা শচীন পাইলট ৰাজ্যখনৰ চৰকাৰৰ মুৰব্বী হওক৷ পিছে গেহলটৰ সমৰ্থনত থকা ৯২ জন বিধায়কে শচীন পাইলটক সমৰ্থন জনোৱা নাই৷ তাৰ বিপৰীতে তেওঁলোকে ‘এক ব্যক্তি এক পদ’ নীতিৰ ক্ষেত্ৰত ৰেহাই বিচাৰিছে আৰু গেহলটকে কংগ্ৰেছৰ সৰ্বভাৰতীয় সভাপতিৰ সমান্তৰালভাৱে ৰাজস্থানৰ মুখ্যমন্ত্ৰী হৈ থাকিবলৈ অনুমতি দিবলৈ দাবী জনাইছে৷ পিছে ৰাহুল গান্ধী আৰু ছোনিয়া গান্ধীৰ নেতৃত্বাধীন কংগ্ৰেছ হাইকমাণ্ড এই প্ৰস্তাৱত সন্মত নোহোৱাত দেওবাৰে নিশা ৯ বজাত ৯২ জন গেহলটপন্থী বিধায়কে ৰাজস্থান বিধানসভাৰ অধ্যক্ষৰ ওচৰত পদত্যাগপত্ৰ দাখিল কৰে৷ কংগ্ৰেছৰ বিদ্ৰোহী বিধায়কসকলে কৈছে– ২০২০ চনত শচীন পাইলটে চৰকাৰৰ বিৰুদ্ধে বিদ্ৰোহ ঘোষণা কৰিছিল৷ তেতিয়া গেহলটে কোনোমতে চৰকাৰখন ৰক্ষা কৰিছিল৷ অন্যথা বিজেপিয়ে ৰাজস্থান নিশ্চিতভাৱে দখল কৰিলেহেঁতেন৷ সেই ক্ষেত্ৰত শচীন পাইলটে বিজেপিক সুযোগ সৃষ্টি কৰি দিছিল৷ সেয়ে গেহলটপন্থী বিধায়কৰ দাবী, তেওঁলোকক শচীন পাইলটক মুখ্যমন্ত্ৰী হিচাপে নালাগে আৰু তেওঁক মুখ্যমন্ত্ৰী হিচাপে তেওঁলোকে নামানে৷ সেয়ে অশোক গেহলটক ৰাষ্ট˜ীয় সভাপতিৰ লগতে ৰাজস্থানৰ মুখ্যমন্ত্ৰীৰ পদতো অধিষ্ঠিত হৈ থাকিবলৈ অনুমতি দিয়াৰ দাবীত ৯২জন বিধায়কে পদত্যাগ কৰে৷ ৰাজস্থান কংগ্ৰেছত সৃষ্টি হোৱা অচলাৱস্থাৰ শীঘ্ৰেই অৱসান নঘটিলে অৱধাৰিতভাৱে ভাগি পৰিব ৰাজস্থানৰ কংগ্ৰেছ চৰকাৰ৷ তেনে পৰিস্থিতিত ৰাজস্থানত বিজেপিয়ে হাঁহি হাঁহি চৰকাৰ গঠন কৰিব পাৰিব৷ কাজেই বিজেপিৰ শাসনলৈ আহিব আন এখন ৰাজ্য৷