অসম জাতীয় পৰিষদ আৰু জাতীয় যুৱ শক্তিৰ চৰাইদেউ জিলা সমিতিৰ দ্বিতীয় বাৰ্ষিক অধিৱেশনখন মাহমৰা বিধানসভা সমষ্টিৰ অন্তৰ্গত কচুমাৰীত অনুষ্ঠিত হয়। অধিৱেশনত অসম জাতীয় পৰিষদৰ সভাপতি লুৰিণজ্যোতি গগৈয়ে অংশগ্ৰহণ কৰি চৰাইদেউ জিলাৰ দুয়োটা সমষ্টি ক্ৰমে মাহমৰা আৰু সোণাৰিৰ যুৱ প্ৰতিনিধি আৰু দলীয় কৰ্মীৰ উপস্থিতিয়ে আগন্তুক দিনত চৰাইদেউ জিলাৰ লগতে সমগ্ৰ অসমতে জাতীয়তাবাদৰ ভেটি যে অধিক শক্তিশালী ৰূপত প্ৰতিষ্ঠা কৰিব, সেয়া নিশ্চিত কৰিছে বুলি মন্তব্য কৰে। অসম জাতীয় পৰিষদৰ চৰাইদেউ জিলা সমিতিৰ সভাপতি মাণিক গগৈৰ সভাপতিত্বত সম্পাদক বিপুল ফুকনে আঁতধৰা অধিৱেশনৰ মুকলি সভাত দুয়োটা সমষ্টিৰ যথেষ্ট সংখ্যক লোকে অংশগ্ৰহণ কৰে।