শংকৰদেৱ কলাক্ষেত্ৰত সংৰক্ষিত হব তুলসী ওজাৰ ঢোল। ৰাজহুৱা আদ‍্যশ্ৰাদ্ধ,স্মৃতিচাৰণ,স্মাৰক গ্ৰন্থ উন্মোচন। টিংখাঙত মন্ত্ৰী বিমল বৰাই মুকলি কৰিলে প্ৰয়াত ওজাৰ নামত পথ। যোৱা 2 জুলাইত মৃত্যু হোৱা লোক শিল্পী তথা ঢোলৰ সম্ৰাট টিংখাঙৰ ভালোকমৰা গাঁৱৰ নিবাসী তুলসী ওজাৰ ৰাজহুৱা আদ‍্যশ্ৰাদ্ধ সোমবাৰে প্ৰয়াত ওজাৰ বাহগৃহৰ সমীপৰ ৰাজহুৱা খেলপথাৰত অনুষ্ঠিত কৰা হয়। ওজাৰ আদ‍্যশ্ৰাদ্ধৰ লগত সংগতি ৰাখি অনুষ্ঠিত হয় এখন স্মৃতি চাৰণ সভা । তুলসী ওজাৰ সৃষ্টি ৰাজি তথা তেওঁৰ জীৱন কালত লাভ কৰা স্বীকৃতি সমূহ একেলগে সংবদ্ধ কৰি প্ৰকাশ কৰি উলিওৱা স্মাৰক গ্ৰন্থখন উন্মোচন কৰে মন্ত্ৰী বিমল বৰাই। লগতে ওজাৰ বাহগৃহলৈ যোৱা পথটো প্ৰয়াত তুলসী ওজাৰ নামত নামাকৰণ কৰি সুন্দৰকৈ নিৰ্মাণ কৰা বাবে ফিটা কাটি উন্মোচন কৰে মন্ত্ৰী গৰাকীয়ে।