બુલિયન માર્કેટમાં સોનાનો ભાવ ત્રણ દિવસમાં લગભગ 1000 રૂપિયા ઉછળ્યો
ગોલ્ડ ફ્યુચર્સનો ભાવ 0.5 ટકા ઘટીને 10 ગ્રામે રૂ. 51,406 થયો
સિલ્વરનો ભાવ 0.5 ટકા ઘટીને 20.22 ડોલર પ્રતિ ઔંસ થયો હતો
યુએસ ડોલર ઈન્ડેક્સ ત્રણ સપ્તાહના તળિયે પહોંચ્યો
ભારતીય બુલિયન માર્કેટમાં સોનાનો ભાવ ત્રણ દિવસમાં લગભગ 1000 રૂપિયા ઉછળ્યા પછી તેમાં ઘટાડો આવ્યો છે. અગાઉના સપ્તાહમાં ગોલ્ડમાં સારી એવી તેજી હતી પરંતુ આજે MCX પર ગોલ્ડ ફ્યુચર્સનો ભાવ 0.5 ટકા ઘટીને 10 ગ્રામે રૂ. 51,406 થયો હતો. જ્યારે ચાંદીનો ભાવ એક કિલો દીઠ 0.6 ટકા ઘટીને રૂ. 58,032 થયો હતો. ગ્લોબલ માર્કેટમાં પણ સોનું ત્રણ અઠવાડિયાની ટોચ પર છે. સોનાને નીચી બોન્ડ યીલ્ડ અને યુએસ ડોલરના પુલબેકનો ફાયદો મળ્યો છે. આજે સ્પોટ ગોલ્ડનો ભાવ પ્રતિ ઔંસ 1755 ડોલર ચાલતો હતો.
અન્ય કિંમતી ધાતુઓની વાત કરીએ તો સિલ્વરનો ભાવ 0.5 ટકા ઘટીને 20.22 ડોલર પ્રતિ ઔંસ થયો હતો. ચીનમાં જુલાઈમાં ઔદ્યોગિક ઉત્પાદનમાં ઘટાડો થયો છે તેવા અહેવાલના પગલે ચાંદીમાં નરમાઈ જોવા મળી હતી. યુએસ ડોલર ઈન્ડેક્સ ત્રણ સપ્તાહના તળિયે પહોંચ્યો છે. માર્કેટના એક્સપર્ટ્સ માને છે કે અમેરિકન અર્થતંત્રમાં મંદી આવવાનું જોખમ હોવાના કારણે યુએસ ફેડ આગામી સમયમાં રેટ હાઈકનું પ્રમાણ નીચું રાખશે. યુએસ ડોલર નબળો પડે તો અન્ય કરન્સી હોલ્ડર્સ માટે ગોલ્ડને ખરીદવાનું સસ્તું પડે છે.
બુલિયન માર્કેટના એક એક્સપર્ટે જણાવ્યા પ્રમાણે અમેરિકાના ઇકોનોમિક ડેટાની જાહેરાત પછી ગયા અઠવાડિયામાં ગોલ્ડ અને સિલ્વરમાં તેજી આવી હતી. આ દરમિયાન ડોલરની સામે યુરો પણ વધ્યો હતો. તેમણે કહ્યું કે સોનાના ભાવને પ્રતિ ઔંસ 1751-1740 ડોલર પર સપોર્ટ છે જ્યારે 1774-1782 પર રેઝિસ્ટન્સ છે. ચાંદીને $19.88-19.65 પર સપોર્ટ અને $20.40-20.55 પર રેઝિસ્ટન્સ છે. રૂપિયામાં જોવામાં આવે તો સોનાને 51,150–50,820ના સ્તરે સપોર્ટ છે. જ્યારે 51,680–51,840 રૂપિયા પર અવરોધ છે. ચાંદીને 57,550-56,940 રૂપિયા પર સપોર્ટ છે અને ₹58,980–59,510 પર અવરોધ છે.
શુક્રવારે વિશ્વના સૌથી મોટા ગોલ્ડ -બેક્ડ એક્સચેન્જ ટ્રેડેડ ફંડ SPDR Gold Trustનું હોલ્ડિંગ 0.06 ટકા વધીને 1005.87 ટન થયું હતું જે ગુરુવારે 1005.29 ટન હતું. ગયા અઠવાડિયે ભારતે ગાંધીનગરમાં ગિફ્ટ સિટી ખાતે દેશના સૌપ્રથમ આંતરરાષ્ટ્રીય બુલિયન એક્સચેન્જને લોન્ચ કર્યું છે. ભારત સમગ્ર વિશ્વમાં સોનાની ખરીદીમાં બીજા ક્રમે છે. આ એક્સચેન્જ દ્વારા ગોલ્ડના માર્કેટમાં પારદર્શિતા આવશે તેમ માનવામાં આવે છે. સ્પોટ એક્સચેન્જ ઘણા બધા લાભ આપે છે અને તે નવી તકનો ભરપૂર લાભ ઉઠાવશે તેમ કહેવામાં આવે છે.
