বঞ্চনাই কোঙা কৰা এখন গাঁও । মন্ত্ৰী বিমল বড়া সমষ্টি টিংখাঙৰ কলৌলোৱা গাঁও পঞ্চায়তৰ অন্তৰ্গত দুলীয়াবাম ব্লক গাঁৱৰ ৰাইজে আজিও দেখা নাই উন্নয়নৰ মুখ । খোৱা পানীৰ সমস্যা, বাট-পথ, গৰাখহনীয়াকে ধৰি এশ এবুৰি সমস্যাৰে ভাৰাক্ৰান্ত গাঁওখন । গাঁখনত মুঠ পৰিয়াল আছে প্ৰায় ৩৫ টা । অধিক সংখ্যকেই আদিবাসী লোক বাস কৰা গাঁওখনলৈ কেৱল নিৰ্বাচনৰ সময়তহে ৰাজনৈতিক নেতা-কৰ্মী সকল আহে । ডিমৌ নদীৰ গৰাখহনীয়াই এক প্ৰকাৰৰ ভাবুকি কঢ়িয়াইছে গাঁওখনলৈ । গাঁওখনৰ লোক সকল অহা যোৱা পথটোৰ কাষতে আছে ডিমৌ নদীখন। নদীখনৰ খহনীয়াই ইতিমধ্যে এই পথটোৰ এটা অংশ খহাই নিছে । গৰাখহনীয়া প্ৰতিৰোধৰ ক্ষেত্ৰত অদ্যাপি কোনো ব্যৱস্থা লোৱা নাই সংশ্লিষ্ট বিভাগে । দৈনিক দিন হাজিৰা কৰি চলা পৰিয়ালকেইটাৰ খোৱা পানী সমস্যাও এক ডাঙৰ সমস্যা । দমকলৰ আইৰনযুক্ত পানীকে সেৱন কৰে গাঁওবাসীয়ে । ইফালে দৰিদ্ৰ পৰিয়ালকেইটাৰ অধিক সংখ্যক পৰিয়ালে পোৱা নাই চৰকাৰী আবাস গৃহ । জৰাজীৰ্ণ উৰুখা প্ৰজাতে বাস কৰিছে বহুকেইটা পৰিয়াল । গাঁওখনৰ অধিক সংখ্যকেই অশিক্ষিত হোৱাত অজ্ঞতাৰ বাবে বহু কেইটা পৰিয়ালৰ সদস্য চৰকাৰী চাউল পোৱাৰ পৰা বঞ্চিত হৈ আছে । পৰিয়ালকেইটাই প্ৰয়োজনীয় নথি জমা নিদিয়াৰ বাবে স্থানীয় এজেণ্টে দিব পৰা নাই চাউল । মুঠৰ ওপৰত সমস্যাৰ অন্ত নাই গাঁওখনত । স্থানীয় বিধায়ক তথা ৰাজ্যৰ কেবিনেট মন্ত্ৰী বিমল বড়াই গাঁওখনৰ ওপৰত পৰৱৰ্তী সময়ত কিমান গুৰুত্ব দিয়ে সেয়া হয়তো সময়ত লক্ষণীয় হ'ব ।
कृष्णा हाइट्स की ओर सभी कोटा एवं बूंदी वासियों को नवरात्री, दशहरा तथा दीपावली की हार्दिक शुभकामनायें |
