সৰুপথাৰ, সদৌ অসম চুতীয়া ছাত্ৰ সন্থাৰ আহ্বান মৰ্মে অসমৰ ছয় জনগোষ্ঠীক প্ৰতাৰণা কৰাৰ অভিযোগ তুলি আজি সৰুপথাৰতো ধনশিৰি মহকুমা চুতীয়া ছাত্ৰ সন্থাই এক প্ৰতিবাদী কাৰ্যসূচী গ্ৰহণ কৰে। ভূমিপুত্ৰ চুতীয়া জনগোষ্ঠীকে ধৰি ৰাজ্যখনৰ ছয় জনগোষ্ঠীৰ জনজাতিকৰণৰ বাবে চৰকাৰক দীৰ্ঘদিন ধৰি দাবী জনাই অহাৰ পিছতো কালি ভাৰত চৰকাৰে পাঁচখন ৰাজ্যৰ বাৰটাকৈ জনগোষ্ঠীক জনজাতিৰ মৰ্যাদা প্ৰদান কৰিলে যদিও অসমৰ ছয় জনগোষ্ঠীক প্ৰতাৰণা কৰিলে। তাৰে প্ৰতিবাদত আজি সমগ্ৰ ৰাজ্যখনৰ লগতে সৰুপথাৰ আৰক্ষী থানাৰ সমীপত সংগঠনটোৱে প্ৰধানমন্ত্ৰী নৰেন্দ্ৰ মোডী আৰু মুখ্যমন্ত্ৰী হিমন্ত বিশ্ব শৰ্মাৰ প্ৰতিকৃতি দাহ কৰি প্ৰতিবাদ সাব্যস্ত কৰে।