ৰাইজৰ অসচেতনতাৰ বাবেই জাবৰে কদৰ্যময় কৰি তুলিছে ডিব্ৰুগড় জিলা খোৱাঙৰ পুৰণা বাছ আস্থান । দ'ম দ'ম জাবৰে ভৰি পৰিছে বাছ আস্থানটোৰ চৌহদ । বৰ্তমান অব্যৱহৃত হৈ থকা বাছ আস্থানটোত এতিয়া কেৱল জাবৰ আৰু জাবৰ । স্থানীয় লোকে জানিবলৈ দিয়া অনুসৰি খোৱাং টাউনৰ একাংশ অসচেতন লোকে দৈনিক এই ঠাইডোখৰত জাবৰ সমূহ পেলাই । যাৰ ফলৰ জাবৰৰ দুগন্ধত কাষেৰে পাৰ হৈ যাব নোৱাৰা এটা পৰিৱেশ সৃষ্টি হৈছে । জাবৰ নিষ্কাষণৰ বাবে খোৱাং ব্যৱসায়ী সন্থালৈ সোনোৱাল কছাৰী স্বায়ত্ত শাসিত পৰিষদৰ পৰা এখন বাহন প্ৰদান কৰিছিল যদি এই বাহনখন বৰ্তমান ফুলদানি সদৃশ সজাই থোৱা হৈছে । ঠাইডোখৰ চৰকাৰী ভূমি হোৱাৰ বাবে লোক সকলে কোনো ভ্ৰূক্ষেপ নকৰি দায়িত্ব জ্ঞানহীন ভাৱে যিয়ে যেনেকে পাৰে জাবৰ সমূহ পেলাবলৈ ধৰিছে । মনকৰিবলগীয়া যে এই ঠাইডোখৰতে খোৱাঙৰ এখন দুৰ্গাপূজাও অনুষ্ঠিত হয় ।