সোণাৰি সমষ্টিৰ বিধায়ক ধৰ্মেশ্বৰ কোঁৱৰে উন্মোচন কৰিলে সোণাৰি মহাবিদ্যালয়ৰ প্ৰতিষ্ঠাপক অধ্যক্ষ গোলাপ বৰগোহাঁইৰ পূৰ্ণাংগ মূৰ্তি। সোণাৰি মহাবিদ্যালয়ৰ সোণালী জয়ন্তী বৰ্ষৰ সামৰণি অনুষ্ঠানৰ লগত সংগতি ৰাখি আজি মহাবিদ্যালয়খনৰ প্ৰতিষ্ঠাপক অধ্যক্ষ গোলাপ বৰগোহাঁইৰ পূৰ্ণাংগ মূৰ্তি উন্মোচন কৰা হয়। সোণাৰি সমষ্টিৰ বিধায়ক তথা সোণাৰি মহাবিদ্যালয়ৰ প্ৰাক্তন ছাত্ৰ ধৰ্মেশ্বৰ কোঁৱৰে উন্মোচন কৰে প্ৰতিমূৰ্তিটো। শাৰীৰিক অসুস্থতাৰ পাছতো মহাবিদ্যালয়ৰ সোণালী জয়ন্তী বৰ্ষৰ সামৰণি অনুষ্ঠানত উপস্থিত থকা গোলাপ বৰগোহাঁইদেৱৰ সন্মুখতে উন্মোচন কৰা হয় তেখেতৰ প্ৰতিমূৰ্তিটো। উন্মোচনী অনুষ্ঠানত উদযাপন সমিতিৰ সভাপতি তথা সাংসদ তপন কুমাৰ গগৈ, সোণাৰি মহাবিদ্যালয়ৰ অধ্যক্ষ, প্ৰাক্তন অধ্যক্ষ ৰবিন চন্দ্ৰ কোঁৱৰৰ লগতে মহাবিদ্যালয় কৰ্তৃপক্ষ, প্ৰাক্তন ছাত্ৰ-ছাত্ৰী তথা শুভাকাংক্ষীসকল উপস্থিত থাকে।