ৰঙিয়া আৰক্ষীৰ বৃহৎ সফলতা । বন্যপ্ৰাণী সৰবৰাহ কৰা আন্তঃৰাষ্ট্ৰীয় বৃহৎ দল উৎখাত ৰঙিয়া আৰক্ষীৰ । ৰঙিয়া থানাৰ ভাৰপ্ৰাপ্ত আৰক্ষী বিষয়া ভাস্কৰ মল্ল পাটোৱাৰীৰ নেতৃত্বত চলা অভিযানত পুৱতি নিশা আৰক্ষীয়ে ৩১ নং ৰাষ্ট্ৰীয় ঘাইপথৰ ৰঙিয়া চোছাইটি চকত জব্দ কৰে দুখন ভি আই পি বাহন । এখন ফৰ্চুনাৰ DL 8C AQ 9876 আৰু আনখন ইন'ভা DL 10 CH 7924 গাড়ীত লৈ অনা হৈছিল বৃহৎ সংখ্যক বন্যপ্ৰাণী । উদ্ধাৰ হোৱা প্ৰাণী কেইটা হৈছে কেংগাৰু ২ টা , চিম্পাঞ্জি ২ টা , বিভিন্ন প্ৰজাতিৰ বান্দৰ ১৯ টা , কাছ ১৮ টা , ভাটৌ ২ টা । উদ্ধাৰ হোৱা বন্যপ্ৰাণী কেইটাৰ আন্তঃৰাষ্ট্ৰীয় বজাৰত আনুমানিক মূল্য কেইবা কোটি টকা হব বুলি আৰক্ষীৰ সূত্ৰত প্ৰকাশ । অভিযানৰ সময়ত আৰক্ষীৰ জালত তামিলনাডু থানেৰ ৰঘু সিঙ আৰু ভিলিপুৰমৰ কাৰ্থিক । বন্যপ্ৰাণী ভৰ্তি বাহন দুখন মিজোৰামৰ সীমাৰ পৰা দিল্লী অভিমুখে গৈ থকা মুহূৰ্তত আৰক্ষীয়ে খেদি খেদি ৰঙিয়াৰ ৩১ নং ৰাষ্ট্ৰীয় ঘাইপথত জব্দ কৰে । সন্দেহ কৰা হৈছে জন্তু সৰবৰাহত জড়িত হৈ আছে আন্তঃৰাষ্ট্ৰীয় চক্ৰ এটা । নিশাৰ অন্ধকাৰৰ সুযোগ লৈ এনেদৰে বন‍্যপ্ৰাণী সৰবৰাহৰ সন্দেহ । উল্লেখ্য যে বন্যপ্ৰাণী সৰবৰাহত গ্ৰেপ্তাৰ হোৱা লোক এজনে নিজকে সেনা বাহিনীৰ বিষয়াৰ পৰিচয় দি পৰিচয় পত্ৰ দেখুৱাইছে । আৰক্ষীয়ে ইতিমধ্যে তদন্ত আৰম্ভ কৰিছে ।