નેશનલ ગેઇમ્સ ઓર્ગેનાઇઝિંગ કમિટિની બેઠક મુખ્યમંત્રીશ્રીની અધ્યક્ષતામાં યોજાઈ*
महावीर कुल्फी सेन्टर की और से बूंदी वासियों को दीपावली की हार्दिक बधाई व शुभकामनाएं
-ઃ *રમત-ગમત મંત્રી શ્રી હર્ષ સંઘવીની ઉપસ્થિતી* :-
*૬ મહાનગરોમાં ૧૭ જેટલા સ્થળોએ વિવિધ ૩૬ રમતો યોજાશે*
*દેશભરના ૩૬ રાજ્યો-કેન્દ્રશાસિત પ્રદેશોના અંદાજે ૭ હજાર ખેલાડીઓ સહભાગી થશે*
*મુખ્ય સચિવશ્રીના નેતૃત્વમાં નેશનલ ગેઇમ્સ એક્ઝિકયુટિવ કમિટિ*
*૬ મહાનગરોમાં સચિવ કક્ષાના અધિકારીઓના વડપણમાં કમિટિઓ કાર્યરત રહેશે*
*તા. ૧પ થી રપ સપ્ટેમ્બર ૬ મહાનગરોમાં સ્પોર્ટસ કાર્નિવલ યોજાશે*
*તા. રર થી ર૯ સપ્ટેમ્બર મેસ્કોટ રેલીનું આયોજન*
............
*મુખ્યમંત્રી શ્રી ભૂપેન્દ્ર પટેલે ગુજરાતમાં આગામી તા.ર૯મી સપ્ટેમ્બરથી યોજાઇ રહેલી ૩૬મી નેશનલ ગેઇમ્સના સફળ આયોજન માટે ઓર્ગેનાઇઝિંગ કમિટિની બેઠકમાં સર્વગ્રાહી સમીક્ષા હાથ ધરી હતી*.
*મુખ્યમંત્રીશ્રીની અધ્યક્ષતામાં યોજાયેલી આ બેઠકમાં રમત-ગમત રાજ્યમંત્રી શ્રી હર્ષ સંઘવી પણ જોડાયા હતા*
*૭ વર્ષના અંતરાલ બાદ યોજાઇ રહેલી આ ૩૬મી નેશનલ ગેઇમ્સનું યજમાન પદ ગુજરાતને મળ્યું છે તેનું ગૌરવ કરતાં મુખ્યમંત્રીશ્રીએ દેશભરના ખેલાડીઓ માટે આ ગેઇમ્સ એક યાદગાર સંભારણું બની રહે તેવું સુદ્રઢ આયોજન સુનિશ્ચિત કરવા આ બેઠકમાં માર્ગદર્શન આપ્યું હતું*.
દેશના ૩૬ રાજ્યો અને કેન્દ્રશાસિત પ્રદેશોના અંદાજે ૮ હજાર ઉપરાંત ખેલાડીઓ આ નેશનલ ગેઇમ્સની વિવિધ ૩૬ રમતોમાં પોતાનું ખેલ કૌશલ્ય ઝળકાવવાના છે. ગુજરાતના ૬ મહાનગરો અમદાવાદ, વડોદરા, રાજકોટ, સુરત, ભાવનગર અને ગાંધીનગરમાં આ રમતોત્સવની વિવિધ સ્પર્ધાઓ યોજાશે.
આ મહાનગરોમાં કુલ મળીને ૧૭ જેટલા સ્થળોએ વિવિધ ૩૬ રમતોનું આયોજન સુચારૂ રીતે પાર પડે તે માટે મુખ્ય સચિવ શ્રી પંકજકુમારના નેતૃત્વમાં નેશનલ ગેઇમ્સ એક્ઝિકયુટીવ કમિટિની રચના કરવામાં આવેલી છે.
આ ઉપરાંત ૬ મહાનગરોમાં પણ સિટી કમિટિની જવાબદારી સચિવ કક્ષાના અધિકારીઓને સોંપવામાં આવી છે.
જેમાં અમદાવાદ માટે શહેરી વિકાસ અગ્ર સચિવ શ્રી મુકેશકુમાર, સુરત માટે જી.આઇ.ડી.સી.ના એમ.ડી શ્રી થેન્નારસન, ભાવનગર માટે એસ.ટી. નિગમના એમ.ડી. શ્રી ગાંધી, રાજકોટ માટે ઉદ્યોગ કમિશનર શ્રી રાહુલ ગુપ્તા, વડોદરા માટે જી.યુ.વિ.એન.એલ ના એમ.ડી શ્રી શિવહરે અને ગાંધીનગર માટે કમિશનર શ્રી મ્યુનિસિપાલીટીઝ એડ્મીનીસ્ટ્રેશન શ્રી રાજકુમાર બેનિવાલ જવાબદારી સંભાળશે.
અમદાવાદના નરેન્દ્ર મોદી સ્ટેડિયમમાં તા. ર૭મી સપ્ટેમ્બરે આ નેશનલ ગેઇમ્સનો ભવ્ય ઉદઘાટન સમારોહ દોઢ લાખ જેટલા રમતપ્રેમીઓ, ખ્યાતનામ ખેલાડીઓની ઉપસ્થિતીમાં યોજાવાનો છે તેના તલસ્પર્શી આયોજનની પણ વિસ્તૃત ચર્ચા-વિચારણા આ બેઠકમાં હાથ ધરવામાં આવી હતી. રમતોત્સવનું સમાપન સુરતના ઇન્ડોર સ્ટેડિયમમાં તા. ૧રમી ઓક્ટોબરે કરાશે.
રમત-ગમત અગ્ર સચિવ શ્રી અશ્વિનીકુમારે આ બેઠકમાં જણાવ્યું કે, નેશનલ ગેઇમ્સ માટે રાજ્યભરમાં ઉત્સાહ-ઉમંગનું વાતાવરણ વધુ ઊજાગર કરવાનું પણ સુગ્રથિત આયોજન કરવામાં આવેલું છે.
તદઅનુસાર, તા.૧ર થી ૧૬ સપ્ટેમ્બર દરમ્યાન શાળા-કોલેજોમાં એક્ટિવેશન, ૬ શહેરોમાં તા. ૧પ થી રપ સપ્ટેમ્બર દરમ્યાન સ્પોર્ટસ કાર્નિવલ તેમજ તા. રર થી ર૯ સપ્ટેમ્બર દરમ્યાન મેસ્કોટ રેલી યોજવામાં આવશે.
આ નેશનલ ગેઇમ્સ સાથોસાથ આદ્યશક્તિની આરાધનાનું પર્વ અને ગુજરાતની વૈશ્વિક ઓળખ નવરાત્રિ પણ આવી રહિ છે તે સુભગ સમન્વય છે. દેશના રાજ્યોના ખેલાડીઓ ગુજરાતની ગરબા-રાસની આ ભાતીગળ સંસ્કૃતિ પણ રમતોત્સવ સાથે માણી શકે તેવા આયોજન અંગે પણ બેઠકમાં વિચાર-વિમર્શ કરાયો હતો.
આ નેશનલ ગેઇમ્સમાં ભાગ લેનારા ખેલાડીઓ સાથે રિયલ ટાઇમ કોમ્યુનિકેશન, આવાસ-ભોજન, વાહન વ્યવહારની માહિતી, ખેલાડીઓની પ્રોફાઇલ અપડેટ અને પરિણામોના રિયલ ટાઇમ અપડેટ માટે ગેઇમ્સ મેનેજમેન્ટ સિસ્ટમ અન્વયે વેબસાઇટ અને એપ લોંચ કરવામાં આવેલા છે તેમ પણ આ બેઠકમાં જણાવાયું હતું.
મુખ્યમંત્રીશ્રીના મુખ્ય અગ્ર સચિવ શ્રી કૈલાસનાથન, મુખ્ય સચિવ શ્રી પંકજકુમાર, પોલીસ મહાનિદેશક શ્રી આશિષ ભાટિયા, મુખ્યમંત્રીશ્રીના અધિક મુખ્ય સચિવ શ્રી પંકજ જોષી, ઊર્જા, નાણાં, રમત-ગમત વિભાગના અગ્ર સચિવશ્રીઓ, પ્રવાસન સચિવશ્રી તથા એસ.ટી.નિગમ, જી.આઇ.ડી.સી, જી.યુ.ડી.એમ ના મેનેજિંગ ડિરેકટરશ્રીઓ આ બેઠકમાં સહભાગી થયા હતા.
સ્પોર્ટસ ઓથોરિટી ઓફ ઇન્ડીયા, ઇન્ડીયન ઓલિમ્પીક એસોસિયેશન તથા ગુજરાત સ્ટેટ ઓલિમ્પીક એસોસિએશનના પ્રતિનિધિઓ પણ આ બેઠકમાં ઉપસ્થિત રહ્યા હતા.
રિપોર્ટર.. ભરતભાઇ ખુમાણ રાજુલા/ અમરેલી
