গোলাঘাট জিলাৰ অসম নাগালেণ্ড সীমান্তৱৰ্তী অঞ্চলসমূহত অৱ্যাহত আছে চোৰাং কাঠৰ বেহা। বিশেষকৈ সীমান্তৱৰ্তী মেৰাপানী অঞ্চলৰ পৰা দৈনিক ট্ৰাকে ট্ৰাকে চোৰাং কাঠ ৰাজ্যৰ ভিন্ন প্ৰান্তলৈ সৰবৰাহ হৈ আছে। আৰক্ষী বনবিভাগৰ চকুত ধুলি দি প্ৰয়োজনীয় নথিপত্ৰ অবিহনেই চোৰাং ব্যৱসায়ীসকলে কাঠ সমূহ প্ৰেৰণ কৰি আহিছে। দেওবাৰে সন্ধিয়া তেনে এখন চোৰাং কাঠ ভৰ্তি মিনিট্ৰাক জব্দ কৰি স্থানীয় ঘিলাধাৰী আৰক্ষী থানাত গতাই দিয়ে স্থানীয় ৰাইজে। AS05 A 7791 নম্বৰৰ টাটা ডি আই বাহনখনত চোৰাং কাঠ বোজাই কৰি গোলাঘাট টাউনৰ দিশে গৈ থাকোতেই স্থানীয় ৰাইজে জব্দ কৰে বাহনখন। সম্প্ৰতি ঘিলাধাৰী আৰক্ষীয়ে কাঠসহ বাহনখন জামুগুৰি আঞ্চলিক বন বিষয়াৰ কাৰ্য্যালয়ত গতাই দিছে।