ৰন্ধনগেছক লৈ জনসাধাৰণৰ মূৰত কোনে দিছে মাধমাৰ । গেছৰ বটলিং ফেক্টৰীত নিৰ্ধাৰিত গেছতকৈ কম গেছ ভৰাই প্ৰেৰণ কৰে নেকি গেছ এজেঞ্চি সমূহলৈ? গোলাঘাটৰ এটা গেছ এজেঞ্চিত যোগান বিভাগৰ এক অভিযানত পোহৰলৈ আহিছে বহু চাঞ্চল্যকৰ ঘটনা । গোলাঘাটৰ এৰেঙাপাৰস্থিত টিকিৰ গেছ এজেঞ্চিত দিনৰ ভাগত নৰ্থ গুৱাহাটীৰ IOC ৰ বলটিং ফেক্টৰীৰ পৰা ৩০৬ টা গেছৰ চিলিণ্ডাৰ আহিছিল ৷ ঠিক তেনেসময়তে গাড়ীত চিলিণ্ডাৰ কেইটা থকা অৱস্থাতেই গোলাঘাট যোগান বিভাগৰ এটা দলে অতৰ্কিত এক অভিযান চলাওতে ধৰা পৰে কেতবোৰ বিস্ফোৰক তথ্য । গাড়ীৰ পৰা এটা এটাকৈ চিলিণ্ডাৰ নমাই ওজন পৰীক্ষা কৰোঁতে নিৰ্ধাৰিত গেছৰ পৰিমাণতকৈ ৭০০ গ্ৰামৰ পৰা ৭ কেজি পৰ্যন্ত গেছ কম বহুসংখ্যক চিলিণ্ডাৰত । যোগান বিভাগৰ সন্দেহ বটলিং ফেক্টৰীৰ পৰাই চিলিণ্ডাৰ সমূহত কম গেছ আহিছে এজেঞ্চিলৈ নহ’লে গেছ সৰবৰাহ কৰা বাহনৰ চালকেও বাটত খেলিমেলি কৰিছে ৷ বৰ্তমান গোলাঘাট যোগান বিভাগে  তদন্ত প্ৰক্ৰিয়া অব্যাহত ৰাখি বলটিং ফেক্টৰীৰ বিৰুদ্ধে গোচৰ ৰুজু কৰিছে বুলি জানিব পৰা গৈছে । এই ঘটনাৰ পিছতেই তীব্ৰ চাঞ্চল্য সমগ্ৰ গোলাঘাটত । ৰন্ধনগেছৰ অত্যাধিক মূল্যই গ্ৰাহকক জুৰুলা কৰাৰ সময়তে চিলিণ্ডাৰৰ গেছৰ নাটনিয়ে সমগ্ৰ ঘটনা ৰহস্যৰ আবৰ্তত সোমাই পৰিছে । যোগান বিভাগৰ সঠিক তদন্ততহে পোহৰলৈ আহিব প্ৰকৃত সত্য ।