মাজুলীৰ অন্যতম উচ্চ শিক্ষানুষ্ঠান উজনি মাজুলী খেৰকটীয়া মহাবিদ্যালয়ৰ বুৰঞ্জী বিভাগৰ মুৰব্বী অধ্যাপক জয়চন্দ্ৰ দলেয়ে আজি কৰ্মজীৱনৰ পৰা অৱসৰ গ্ৰহণ কৰাত মহাবিদ্যালয়খনৰ তৰফৰ পৰা বিদায় সম্বৰ্ধনা জনোৱা হয় । মহাবিদ্যালয়খনৰ অৰ্থনীতি বিভাগৰ সহকাৰী অধ্যাপক ডঃ উপেন বৰাই উদ্বোধন কৰা বিদায় সম্বৰ্ধনা সভখনত সভাপতিত্ব কৰে অধ্যক্ষ ড০ জাহ্নৱী লহকৰ বৰুৱাই । সভাৰ আৰম্ভণিতে অৱসৰী ভাৰপ্ৰাপ্ত অধ্যক্ষ গৰাকীক শিক্ষক গোট, ছাত্র একতা সভাই সভাগৃহলৈ আদৰণি জনাই আনে । মহাবিদ্যালয় শিক্ষক গোট আৰু ছাত্ৰ একতা সভাই পৃথকে পৃথকে গামোচা, চেলেং, সম্বৰ্ধনা পত্ৰ, গ্ৰন্থৰ টোপোলা, শৰাই আদিৰে সম্বৰ্ধনা জ্ঞাপন কৰে ।ইয়াৰোপৰি মহাবিদ্যালয়ৰ বিভিন্ন বিভাগৰ তৰফৰ পৰাও ভাৰপ্ৰাপ্ত অধ্যক্ষ গৰাকীক সম্বৰ্ধনা জ্ঞাপন কৰে। উজনি মাজুলী খেৰকটীয়া মহাবিদ্যালয়ৰ অৱসৰপ্ৰাপ্ত অৱসৰপ্ৰাপ্ত অধ্যাপক দীলিপ কুমাৰ ফুকন, গনেশ হাজৰিকা, মনিকান্ত মিলি, তোলেন চুতীয়া, মিচিং ছাত্ৰ সংগঠনকে আদি কৰি ভালেসংখ্যক দল-সংগঠন, প্ৰাক্তন ছাত্ৰই অৱসৰী অধ্যাপক গৰাকীক সম্বৰ্ধনা জনাই । অনুষ্ঠানত সন্মানীয় অতিথি হিচাপে মহাবিদ্যালয় পৰিচালনা সমিতিৰ সভাপতি তথা অৱসৰপ্ৰাপ্ত অধ্যক্ষ ফনীধৰ টাহুৱে বক্তব্য আগবঢ়াই । উজনি মাজুলীৰ জনজাতি অধ্যুষিত অঞ্চলটিত ১৯৭৩ চনতে প্ৰতিষ্ঠা কৰা মহাবিদ্যালয়খনত নিজকে নিয়োজিত কৰি সুদীৰ্ঘ কাল শিক্ষকতা জীৱনৰ তিতা-মিঠা অভিজ্ঞতা সোঁৱৰণ কৰি বিদায়ী অধ্যাপক গৰাকী আবেগিক হৈ পৰে ।