ভৰ বাৰিষা শাওণৰ পথাৰ শুৱণি কৰি নাৰায়ণপুৰত জাক জাক ৰোৱনী নামিছে নাৰায়ণপুৰৰ পথাৰত ৷ ১০৮ নং বিহপুৰীয়া সমষ্টিত বিধায়ক অমিয় কুমাৰ ভূঞাৰ উদ্যোগত সমষ্টিভিত্তিত গঠিত বীৰ লাচিত বহুমুখী সমবায় সমিতিৰ দ্বাৰা নাৰায়ণপুৰৰ ৰঙতিস্থ কৃষি বিভাগৰ বীজ পামৰ পয়সত্তৰ বিঘা মাটিত আজি ভুঁই ৰোৱা কাৰ্য শুভাৰম্ভ কৰা হয় ৷ বিধায়কগৰাকীৰ নেতৃত্বত কেইবাশ মহিলা সমবেত হৈ বিহুনাম গায় ভুঁই ৰোৱে ৷ সমষ্টিটোত কৃষকসকল স্বনিৰ্ভৰশীল হোৱাৰ বাবে মুখ্যমন্ত্ৰী হিমন্তবিশ্ব শৰ্মাই  বিধায়কসকলক জনোৱা আহ্বানৰ প্ৰতি সহাৰি জনাই গঠন কৰা বীৰ লাচিত বহুমুখী সমবায় সমিতিৰ জৰিয়তে বিহপুৰীয়া সমষ্টিত চৌদিশে আৰম্ভ কৰা হৈছে কৃষিকাৰ্য ৷ তাৰেই অংশস্বৰূপে আজি ৰঙতিত আৰম্ভ হৈছে ভুঁই ৰোৱা কাৰ্য ৷ বিজেপি দলৰ পঞ্চায়ত প্ৰতিনিধি জিলা পৰিষদ সদস্য সদস্যা আৰু বিষয়ববীয়াৰ লগতে কৰ্মকৰ্তাসকলে একেলগে ভুঁই ৰুই আনন্দ উল্লাহ কৰি সমষ্টিবাসীক কৃষিৰ প্ৰতি আকৰ্ষণ বৃদ্ধি কৰাৰ বাৰ্তা প্ৰেৰণ কৰে ৷