পেঙেৰি তৰাণি সংৰক্ষিত বনাঞ্চলৰ মাজত পথৰ এটা বৃহৎ গাঁতৰ পৰা এটা হাতীৰ পোৱালি উদ্ধাৰ কৰা হৈছে। বনাঞ্চলৰ মাজৰ পৰা ওলাই অহা হাতীৰ পোৱালিটো পথৰ কাষতে থকা এটা বৃহৎ গাঁতত সোমাই পৰে। বহু সময় ধৰি আৰ্তনাদ কৰি থকা গজৰাজৰ পোৱালিটো অবশেষত স্থানীয় ৰাইজ আৰু বন কৰ্মীৰ সহযোগত নলাটো বহলাই খান্দি পোৱালিটো গাঁতৰ পৰা ওলাই অহাত সহায় কৰে। গাঁতৰ পৰা মুক্তি লাভ কৰাৰ পিছত হাতীৰ পোৱালিটো পুনৰ বনাঞ্চলৰ ভিতৰ চৰালৈ ঢাপলি মেলে । স্থানীয় ৰাইজৰ মত অনুসৰি পথ নিৰ্মাণ কৰা ঠিকাদাৰৰ গাফিলতিৰ বাবেই এই কাণ্ড সংঘটিত হবলৈ পালে। কিয়নো পথ নিৰ্মাণ কৰোতে ঠিকাদাৰে পথৰ কাষতে এই বৃহৎ গাঁত খন্দাৰ ফলত এনেধৰণৰ ঘটনাৰ সাক্ষী হব লগা বুলি উল্লেখ কৰিছে স্থানীয় ৰাইজে।