গোৱালপাৰা জিলাৰ বিভিন্ন প্ৰান্তত বন বিভাগে চোৰাং কাঠ সৰবৰাহ তথা অবৈধ কাঠফলা কলৰ বিৰুদ্ধে অভিযান অব্যাহত ৰাখিছে ৷ ইয়াৰ মাজতে ধূপধৰাৰ সমীপৰ মালাংকোণাত বনবিভাগে এটা অবৈধ কাঠফলা কল উৎখাত কৰিবলৈ সক্ষম হয় । প্ৰাপ্ত তথ্যমতে গোপন সূত্ৰে লাভ কৰা এক খবৰৰ ভিত্তিত ৰংজুলি বনাঞ্চলিক কাৰ্যালয়ৰ বন বিষয়া শৰত দাসৰ নেতৃত্বত যোৱা এটি বনকৰ্মীৰ দলে ধূপধৰাৰ মালাংকোণাত অভিযান চলাই অবৈধ কলটো উৎখাত কৰাৰ লগতে বৃহৎ পৰিমাণৰ চোৰাং শালগছৰ কুণ্ডা জব্দ কৰিবলৈ সক্ষম হয় । পিচত জব্দ কৰা মিলৰ যন্ত্ৰপাতিৰ লগতে কুণ্ডাসমূহ ধূপধৰাস্থিত কাঠভঁৰাল চৌহদলৈ অনা হয় ।