অহা-যোৱা কৰিবলৈ পথ নাই ৰহাৰ ৰহাচকী, মাজগাঁও, হাৰিয়ামুখ অঞ্চলত। অভাৱনীয় সমস্যাত পৰিছে ছাত্ৰ-ছাত্ৰী, জনসাধাৰণ। বিগত প্ৰলয়ংকৰী কলঙৰ বানে ভাগি নিলে ৰহাৰ ৰহাচকীৰ পথৰ এটা অংশ। আজিও পোনপটীয়া যোগাযোগ বিচ্ছিন্ন হৈ আছে অঞ্চলটোৰ। কিন্তু শেহতীয়াকৈ অঞ্চলটোৰ ছাত্ৰ-ছাত্ৰীসকল সন্মুখীন হৈছে অভাৱনীয় সমস্যাৰ। স্কুল কলেজলৈ আহিবলৈ পথ নাই। বানে ভগা অংশত লোকনিৰ্মাণ বিভাগে এখন বাঁহৰ দলং সাজি দিছে। কিন্তু সেই দলঙেৰে ছাত্ৰ-ছাত্ৰী অহা-যোৱা কৰা সুচল নহয়। বাঁহৰ দলং পাৰ হৈ ৰে'লপথত উঠিব লাগে। চাওক কেনেদৰে বৃহত্তৰ অঞ্চলটোৰ ছাত্ৰ-ছাত্ৰী অহা-যোৱা কৰিবলগীয়া হৈছে। কন কন ছাত্ৰ-ছাত্ৰীক অভিভাৱকে দাঙি আনিবলগীয়া হৈছে, চাইকেলখন দাঙি আনি দিছে কোনোৱে। এনেদৰেই এতিয়া অঞ্চলটোৰ ছাত্ৰ-ছাত্ৰীসকলে বিপদসংকুলভাৱে যাতায়াত কৰিবলগীয়া হৈছে। বান শুকুৱা প্ৰায় দুমাহেই হ'ল যদিও আজিলৈকে বানে ভগা পথচোৱা মেৰামতি কৰা নহ'ল। যাৰ ফলত অঞ্চলৰ অগনন ছাত্ৰ-ছাত্ৰী আৰু জনসাধাৰণে এতিয়া যমৰ যাতনা ভুগিবলগীয়া হৈছে। সেয়ে শীঘ্ৰে বানে ভগা পথটো পুনৰ নিৰ্মাণ কৰিবলৈ চৰকাৰক অনুৰোধ কৰিছে ছাত্ৰ-ছাত্ৰী, স্থানীয় ৰাইজৰ লগতে বিভিন্ন দল সংগঠনে।