રાજકોટમાં મેયર ડો.પ્રદીપ ડવના વોર્ડ નંબર 12માં વરસાદી પાણીના કારણે રોડ પરનો ડામર જાણે ખોવાઈ જ ગયો હોય તેવા દૃશ્યો સર્જાયા હતા જેને પગલે મસ મોટા ખાડા પડી જવાથી વાહનચાલકોને ભારે મુશ્કેલીનો સામનો કરવો પડ્યો હતો. આ મામલે સ્થાનિકો દ્વારા AAPનાં નેતા વશરામ સાગઠીયા સાથે મેયરને રજૂઆત કરવા પહોંચ્યા હતા. જોકે ત્યાં AAP નેતા અને પોલીસ વચ્ચે ઘર્ષણ થતા પોલીસ દ્વારા ટીંગાટોળી સાથે વશરામ સાગઠિયાની અટકાયત કરવામાં આવી હતી.

સાગઠિયાએ મીડિયા સમક્ષ આક્રોશ ઠાલવ્યો
આ અંગેની પ્રાપ્ત વિગતો અનુસાર વોર્ડ નંબર 12માં રોડ રસ્તાઓ મામલે સ્થાનિકો સાથે વશરામ સાગઠિયા રજુઆત માટે પહોંચ્યા હતા. જો કે તેઓ આ અંગેની રજૂઆત કરે તે પહેલાં જ વિજિલન્સ પોલીસ સાથે ઘર્ષણ થતા મામલો વધુ બીચકયો હતો. અને વશરામ સાગઠિયાની ટીંગાટોળી સાથે અટકાયત કરવામાં આવી હતી. આ તકે વશરામ સાગઠિયાએ મીડિયા સમક્ષ આક્રોશ ઠાલવતા જણાવ્યું હતું કે, ખુદ મેયરના વોર્ડમાં રોડ-રસ્તા મુદ્દે લોકો હાલાકી ભોગવતા હોવાથી આ વિસ્તારના લોકો સાથે રજૂઆત કરવા આવ્યો હતો. દરમિયાન જાણે લોકોના પ્રશ્ને રજુઆત કરવી ગુનો હોય તેવી રીતે મારી અટકાયત કરવામાં આવી છે.

10 વર્ષથી આ રસ્તાનો પ્રશ્ન ઉકેલાયો નથી: સ્થાનિક
સમગ્ર મામલે આ વિસ્તારનાં રહેવાસી પાંભર પુયુષનાં જણાવ્યા મુજબ, અમારો વિસ્તાર શહેરનાં મેયરનો વોર્ડ હોવા છતાં છેલ્લા 10 વર્ષથી આ રસ્તાનો પ્રશ્ન ઉકેલાયો નથી. રસ્તો બિસ્માર હોવાને કારણે વારંવાર શાળાનાં વિધાર્થીઓ સહિત લોકોને ઈજાઓ થયાનાં બનાવો બની ચુક્યા હોવા છતાં તંત્રના પેટનું પાણી હલતું નથી. મેયરનો વોર્ડ હોવા છતાં આ મામલે કોઇ પગલાં નહીં લેવાતા અમે રજૂઆત કરવા પહોંચ્યા હતા. પરંતુ રજુઆત સાંભળવાને બદલે અમારી પણ અટકાયત કરાઈ છે.

AAP ખોટી રજૂઆતો લાવીને લોકોને ગેરમાર્ગે દોરે છે: મેયર
બીજીતરફ સમગ્ર મામલે મેયર ડો. પ્રદીપ ડવે જણાવ્યું હતું કે, AAPના કોર્પોરેટર વશરામ સાગઠિયા દ્વારા આજે માધવપાર્કનાં રોડ મામલે રજૂઆત કરવામાં આવી છે. જો કે આ જગ્યા કલેક્ટરનાં કબ્જાની હોવાથી મેં ચાર મહિના અગાઉ આ મામલે કલેક્ટરને લેખિત રજુઆત કરી હતી. પરંતુ ત્યાંથી મળેલા જવાબ મુજબ આ જગ્યા માટે કોર્ટ કેસ ચાલી રહ્યો હોવાથી હાલ કોઈ કામગીરી થઈ શકે તેમ નથી. ત્યારે તેના વિકલ્પ માટે અમે અન્ય પ્રાઇવેટ માલિકીની જમીન કોર્પોરેશન દ્વારા લઈને આગળની કાર્યવાહી કરવામાં આવનાર છે. વશરામ સાગઠિયા માત્ર મત મેળવવા માટે આવી ખોટી રજૂઆતો લાવીને લોકોને ગેરમાર્ગે દોરવાનો આરોપ પણ મેયરે લગાવ્યો છે.