દિલ્હી એક્સાઇઝ પોલિસીમાં થયેલા ગોટાળાના સંદર્ભમાં ગૃહ મંત્રાલય (MHA)એ સોમવારે મોટી કાર્યવાહી કરી છે. મંત્રાલયે અનિયમિતતાના આરોપમાં તત્કાલિન આબકારી કમિશનર અર્વા ગોપી કૃષ્ણા અને ડેપ્યુટી કમિશનર આનંદ તિવારીને સસ્પેન્ડ કરી દીધા છે. દિલ્હીના લેફ્ટનન્ટ ગવર્નર વિનય કુમાર સક્સેનાની ભલામણ બાદ ગૃહ મંત્રાલયે દિલ્હીના એક્સાઇઝ કમિશનર ગોપી કૃષ્ણા અને ડેપ્યુટી એક્સાઇઝ કમિશનર આનંદ કુમાર તિવારીને સસ્પેન્ડ કરી દીધા છે.

નોંધનીય છે કે આ પહેલા નવી એક્સાઇઝ પોલિસી સંબંધિત તપાસ રિપોર્ટમાં 11 અધિકારીઓના નામ સામે આવ્યા હતા. તેમાંથી 9 અધિકારીઓને લેફ્ટનન્ટ ગવર્નરે પહેલા જ સસ્પેન્ડ કરી દીધા હતા. ઉપરાંત, આ 2 અધિકારીઓને સસ્પેન્ડ કરવાની ભલામણ ગૃહ મંત્રાલયને કરવામાં આવી હતી, કારણ કે આ બંને અધિકારીઓને સસ્પેન્ડ કરવાનો અધિકાર ગૃહ મંત્રાલય પાસે છે. સૂત્રોના જણાવ્યા અનુસાર આ અધિકારીઓને સસ્પેન્ડ કરવાની માહિતી લેફ્ટનન્ટ ગવર્નરના કાર્યાલય દ્વારા દિલ્હીના મુખ્ય સચિવ અને દિલ્હી સરકારના સંબંધિત વિભાગોને આપવામાં આવી છે. હાલમાં જ સીબીઆઈએ આ બંને અધિકારીઓના ઘરે પણ દરોડા પાડ્યા હતા.

દિલ્હીના નાયબ મુખ્ય પ્રધાન મનીષ સિસોદિયા ગયા વર્ષે નવેમ્બરમાં લાગુ કરવામાં આવેલી એક્સાઇઝ નીતિમાં કથિત અનિયમિતતાના સંબંધમાં નોંધાયેલી CBI FIRમાં ઉલ્લેખિત 15 નામોમાંથી એક છે. એફઆઈઆરમાં આરોપ છે કે સિસોદિયા, કૃષ્ણા, તિવારી અને અન્યોએ સક્ષમ અધિકારીની મંજૂરી વિના લાયસન્સધારકોને અનુચિત લાભ આપવાના ઈરાદાથી વર્ષ 2021-22ની આબકારી નીતિ અંગે ભલામણો અને નિર્ણયો કર્યા હતા જેમાં મહત્વની ભૂમિકા ભજવી હતી.

તપાસ એજન્સીએ શુક્રવારે આ કેસના સંબંધમાં સિસોદિયાના ઘર અને અન્ય ઘણા સ્થળો પર દરોડા પાડ્યા હતા, જેનાથી AAPની આગેવાનીવાળી દિલ્હી સરકાર અને કેન્દ્ર વચ્ચે શબ્દ યુદ્ધ શરૂ થયું હતું. દરોડા કેટલાક કલાકો સુધી ચાલુ રહ્યા, AAP એ કહ્યું કે નરેન્દ્ર મોદીની આગેવાની હેઠળની કેન્દ્ર સરકાર કેન્દ્રીય એજન્સીઓનો ઉપયોગ કરી રહી છે કારણ કે તે દિલ્હીના મુખ્યમંત્રી અરવિંદ કેજરીવાલની તેમના સુશાસન માટે વધતી લોકપ્રિયતાથી ડરતી હતી