બનાસકાંઠા જીલ્લામાં ડ્રગ્સ સહીતની નશાકારક ચીજોની હેરાફેરી રોકવા પોલીસની વિવિધ ટીમો દ્વારા વિશેષ કાર્યવાહી હાથ ધરવામાં આવી છે. ત્યારે ગત તા. 06/06/2026 ના રોજ બનાસકાંઠા જીલ્લા એસ.ઓ.જી. પોલીસની ટીમે બાતમીના આધારે કંસારી ટોલનાકા પાસે હુન્ડાઇ કંપનીની સફેદ કલરની ઓરા ગાડી (નં. GJ-08-CS-1327) માંથી ડીસાના બે શખ્સોને ઝડપી પાડ્યા હતા. તેમની પાસેથી રૂ. 48,000 ની કિંમતનું 16 ગ્રામ મેફેડ્રોન મળી આવ્યું હતું.

તપાસ દરમિયાન પકડાયેલા આરોપીઓને મેફેડ્રોન વેચાણથી આપનાર આરોપી ડાહ્યાભાઇ કાનજીભાઇ ચૌધરી (રહે. માલોત્રા, તા. ધાનેરા, જી. બનાસકાંઠા) હોવાનું ખુલ્યું હતું. આ માહિતીના આધારે પો.સ.ઇ. જે.જે. સરવૈયાની એસ.ઓ.જી. ટીમ અને એલ.સી.બી. ટીમના પોલીસ સ્ટાફ દ્વારા ધાનેરા વિસ્તારમાં સઘન ઓપરેશન હાથ ધરી વોચ ગોઠવવામાં આવી હતી.

જેમાં ખાનગી બાતમીના આધારે આરોપી ડાહ્યાભાઇ ચૌધરી થાવર ત્રણ રસ્તા પાસેથી મળી આવતાં તેને ઝડપી લેવામાં આવ્યો હતો અને આરોપીનો કબજો આગળની કાર્યવાહી માટે તપાસ કરનાર અધિકારીને સોંપવામાં આવ્યો છે.