ડીસા તાલુકાના જૂનાડીસા ગામના ખળવાડવાસ વિસ્તારમાં રહેતાં રાજેશકુમાર ઉર્ફે રાજુભાઇ પશાભાઇ પ્રજાપતિ ગત તા. 26 મેના રોજ પાટણ હાઇવે પર આવેલા પોતાના ખેતરે હાજર હતા. ત્યારે તેમના ભાગીદાર લેરાજી ઠાકોર ટ્રેક્ટર ટ્રોલી લઇને બાજરીના પૂળા ભરવા આવ્યા હતા. આ વખતે રસ્તામાંથી પસાર થતી પાણીની પાઇપ ટ્રેક્ટર નીચે આવી જતાં તૂટી ગઇ હતી.

આ બાબતે બાજુના ખેતરના ભાગીદાર વદનજી ઠાકોરે આવીને ઝઘડો કર્યો હતો. રાજેશકુમારે પાઇપ નવી લાવી આપવા અથવા રીપેર કરી આપવાની તૈયારી બતાવી હોવા છતાં મામલો ઉગ્ર બન્યો હતો. થોડીવાર બાદ વદનજી ઇશ્વરજી ઠાકોર ધારીયું અને ઉદાજી ઇશ્વરજી ઠાકોર લાકડી લઇને મોન્ટુ બળવંતજી ઠાકોર અને લીલાબેન કપુરજી ઠાકોર સાથે ધસી આવ્યા હતા. વદનજીએ ધારીયા વડે હુમલો કરતાં બચાવ કરવા જતાં રાજેશકુમારની આંગળીમાં ગંભીર ઇજા થઇ હતી. આ અંગે ડીસા તાલુકા પોલીસ મથકે ચાર શખ્સો સામે ફરિયાદ નોંધાવતાં પોલીસે ગુનો નોંધી વધુ તપાસ હાથ ધરી છે.