ડીસાના ભીલડી હાઇવે રોડ આવેલ કુંપટના પાટીયાથી માલગઢ ગામની મોટી ઢાંણીમાં વૈષ્ણોદેવી કોલ્ડ સ્ટોરેજથી મેગનમ ઇરીગેશન ફેક્ટરી અને ગોગા ઢાંણી તેમજ શિતળા માતાજીના મંદિરને જોડતો મુખ્ય માર્ગ ઘણા વર્ષોથી કાચા રસ્તાથી બિસ્માર હાલતમાં હતો.

ત્યારે આ રસ્તાની કામગીરી અગાઉ ડીસાના પૂર્વ ધારાસભ્ય ગોરધનજી ગીગાજી માળીએ 20 વર્ષ અગાઉ આ રોડ માર્ગ અને મકાન પંચાયત વિભાગમાં મંજૂર કરાવ્યું હતું. ત્યારબાદ ડીસાના ધારાસભ્યની ગ્રાન્ટમાંથી આ રોડનું ખાતમુહૂર્ત કરી મેટલ પાથર્યું હતું. જોકે, કોઇ કારણોસર આ રોડની કામગીરી શક્ય બની ન હતી. ત્યારે ડીસાના ધારાસભ્ય અને વન પર્યાવરણ મંત્રી પ્રવિણભાઇ માળીને માલગઢ ગામના જાગૃત ગ્રામજનોએ વર્ષો જૂની કાચા રસ્તાની ધારદાર રજૂઆત કરતાં તેઓએ તાત્કાલીક ડીસા માર્ગ અને મકાન વિભાગ કચેરીમાં લેખિત રજૂઆત કરી હતી. 

ત્યારે માર્ગ અને મકાનના અધિકારીઓએ આ રોડની રજૂઆત ધ્યાને લઇ આ નવિન ડામર રોડની તાત્કાલીક દરખાસ્ત મંજૂર કરાવી હતી. ત્યારે ડીસાના ધારાસભ્ય અને વન પર્યાવરણ મંત્રીએ ડીસાના ધારાસભ્યની ગ્રાન્ટમાંથી માર્ગ અને મકાન પંચાયત વિભાગમાં રૂ. 1.35 કરોડના ખર્ચે 1.4 કિ.મી. ના અંતરે 20 વર્ષ બાદ નવિન ડામર રોડની મોટી ભેટ આપી પિતાનું ઋણ અદા કર્યું હતું. ત્યારે આ રોડની કામગીરી દરમિયાન ડીસાના ધારાસભ્ય અને વન પર્યાવરણ મંત્રી પ્રવિણભાઇ માળીએ રૂબરૂ મુલાકાત લઇ નવિન રોડનું નિરીક્ષણ કર્યું હતું.

ત્યારે મંત્રીએ આ નવિન રોડની કામગીરી વિશે ચોમાસામાં વરસાદી પાણી ખેતરોમાં ન ભરાય તે માટે ગ્રામજનો વચ્ચે ખાસ ચર્ચા-વિચારણા પણ કરી હતી. જ્યારે ડીસા માર્ગ અને મકાન પંચાયત વિભાગની ટીમે નવિન રોડમાં ખડેપગે ઉભા રહી સરાહનીય કામગીરી કરી હતી. જ્યારે માલગઢ, કુંપટ અને ખેતર વિસ્તારમાં સીધી કનેક્ટિવિટી આપતો નવિન રોડ બનતાં ગ્રામજનોમાં ખુશીની લહેર પ્રસરી ગઇ છે. જ્યારે ખેતર વિસ્તારમાંથી અવર-જવર કરતાં ગ્રામજનોને 2 થી 3 કિ. મી. ફરીને નહીં આવવું પડે સમય અને ઇંધણની બચત પણ થશે.

આ પ્રસંગે માલગઢના પૂર્વ સરપંચ સોમાલાલ આર. કચ્છવા, માલગઢના જીલ્લા ડેલીગેટ મનોજભાઇ એમ. દેવડા, માલગઢના તાલુકા પૂર્વ ડેલીગેટ નરેશભાઇ પી. સોલંકી, હાર્દિકભાઇ ડી. ગેલોત, સુરેશભાઇ એન. ટાંક, અગ્રણીઓ અને ગ્રામજનો મોટી સંખ્યામાં ઉપસ્થિત રહ્યા હતા.