આગામી જિલ્લા પંચાયતની ચૂંટણીના જંગમાં હવે ગરમાવો આવ્યો છે. તળાજા તાલુકાની મહત્વની ગણાતી દિહોર જિલ્લા પંચાયત બેઠક પરથી ભારતીય રાષ્ટ્રીય કોંગ્રેસે શિક્ષિત અને યુવા ઉમેદવાર હાર્દિકભાઈ જીણાભાઈ રાઠોડને મેદાનમાં ઉતાર્યા છે. ગ્રેજ્યુએશન સુધીનો અભ્યાસ પૂર્ણ કરનાર હાર્દિકભાઈ હાલ દિહોર ગ્રામ પંચાયતના સદસ્ય તરીકે પણ સેવા આપી રહ્યા છે. પૂર્વ જિલ્લા પંચાયત સદસ્ય જીતુભાઈ પનોતના સમર્થન સાથે તેઓ હવે જિલ્લા સ્તરે પ્રતિનિધિત્વ કરવા તૈયાર થયા છે.

હાર્દિકભાઈ રાઠોડે પોતાના પ્રચાર અભિયાનમાં મતદારો સાથે સીધો સંવાદ સાધતા જણાવ્યું હતું કે, તેઓ છેલ્લા ઘણા વર્ષોથી વિદ્યાર્થીઓના પ્રશ્નો અને સામાજિક કાર્યોમાં સક્રિય છે. તેમણે લોકસંપર્ક દરમિયાન ખાતરી આપી હતી કે જો જનતા તેમને વિજયી બનાવશે, તો તેઓ વિસ્તારમાં શિક્ષણ, આરોગ્ય અને પાયાની જરૂરિયાત સમાન રસ્તાઓના કામોને પ્રાથમિકતા આપશે. ખાસ કરીને ગામડાઓમાં આધુનિક માળખાગત સુવિધાઓ પહોંચાડવી અને સરકારી યોજનાઓનો લાભ છેવાડાના માનવી સુધી પહોંચાડવો એ તેમનો મુખ્ય સંકલ્પ છે.

દિહોર બેઠકમાં આવતા મામસી, સમઢીયાળા, નેસવડ, ભદ્રાવળ, ટીમાણા અને હબુકવડ સહિતના તમામ ગામોમાં કોંગ્રેસ દ્વારા ઝંઝાવતી પ્રચાર શરૂ કરી દેવામાં આવ્યો છે. 'મારો મત દોડીને કામ કરે એવા વ્યક્તિને' તેવા સૂત્ર સાથે હાર્દિકભાઈએ યુવા મતદારો અને ખેડૂતોને રીઝવવા પર ભાર મૂક્યો છે. શિક્ષિત ઉમેદવાર મેદાનમાં હોવાથી આ બેઠક પર રસાકસીભર્યો જંગ જામવાની શક્યતા જોવા મળી રહી છે