બનાસકાંઠા LCB એ પાલનપુર હાઈવે પરથી ચોરાયેલ મોટર સાયકલ સાથે રાજસ્થાની વાહનચોર પકડાયો..

બનાસકાંઠા લોકલ ક્રાઈમ બ્રાન્ચ (LCB) એ પાલનપુર શહેરના ડીસા હાઈવે પરથી ચોરાયેલ મોટરસાયકલ સાથે રાજસ્થાનના એક રીઢા વાહન ચોર ને ઝડપી પાડ્યો છે, પકડાયેલો આરોપી અગાઉ ત્રણ વાહન ચોરીના ગુનાઓમાં સંડોવાયેલો હતો..

બનાસકાંઠા જિલ્લામાં પાલનપુર, ડીસા અને ધાનેરા જેવા વિસ્તારોમાં વાહન ચોરીના બનાવોમાં વધારો થતાં, પોલીસ મહાનિરીક્ષક પરીક્ષિતા રાઠોડ (IPS) અને પોલીસ અધિક્ષક પ્રશાંત સુંબે (IPS) એ LCB ને સક્રિય થવા સૂચના આપી હતી, વાહન ચોરીના અનડિટેક્ટ ગુનાઓ શોધી કાઢવા અને આવા ગુનાઓ અટકાવવા માટે LCB ની પાંચ ટીમો બનાવવામાં આવી હતી..

આ સૂચનાના આધારે, LCB ના ઇન્ચાર્જ પોલીસ ઇન્સ્પેક્ટર ડી.એમ. રાઠોડ અને પોલીસ સબ ઇન્સ્પેક્ટર આર.બી. જાડેજાના નેતૃત્વ હેઠળ ટીમો કાર્યરત હતી, હેડ કોન્સ્ટેબલ દિલીપસિંહ દલજીજી અને કનકસિંહ રાજેન્દ્રસિંહ ની ટીમને મળેલી બાતમીના આધારે ભીમારામ મોવારામ ગમેતી (રહે. ભુલા, તા. રોહીડા, જિ. સિરોહી, રાજસ્થાન) ને ઝડપી પાડવામાં આવ્યો..

આરોપી પાસેથી GJ.08.BL.5487 નંબર નું હીરો HF ડીલક્સ મોટરસાયકલ મળી આવ્યું હતું, પૂછપરછ દરમિયાન સંતોષકારક જવાબ ન મળતા તપાસ કરતા જાણવા મળ્યું કે આ મોટર સાયકલ મયંકકુમાર કનુભાઈ પ્રજાપતિ (રહે. લુણવા, તા. પાલનપુર) ની માલિકીનું હતું અને આરોપીએ તેની ચોરી કરી હતી, ચોરાયેલ મોટર સાયકલની કિંમત ₹35,000 આંકવામાં આવી છે..

પોલીસ તપાસમાં સામે આવ્યું છે કે આરોપીઓ રાજસ્થાન ના વતની છે અને છૂટક મજૂરી કામ માટે પાલનપુર તથા આસ પાસના વિસ્તારોમાં આવે છે, મજૂરી કરીને પરત ફરતી વખતે તેઓ ડુપ્લીકેટ ચાવીનો ઉપયોગ કરીને મોટર સાયકલ ચોરી કરે છે, ચોરાયેલા વાહનો ને તેઓ પોતાના વતનમાં લઈ જઈને પોતાની જ્ઞાતિના લોકોને ઓછી કિંમતે વેચી દે છે..

આ ગુનામાં પકડાયેલ આરોપી ભીમારામ મોવારામ ગમેતી (રહે. ભુલા, તા. રોહીડા, જિ. સિરોહી, રાજસ્થાન) છે. આ ઉપરાંત, રમેશ ઉર્ફ રોમી રાણારામ ગમેતી અને દિનેશ લાડુમહારાજ ગમેતી (બંને રહે. ભુલા, તા. રોહીડા, જિ. સિરોહી, રાજસ્થાન) વોન્ટેડ જાહેર કરાયા છે..