પાવીજેતપુરની આરાધના પી.ટી.સી. કોલેજ ખાતે ‘વેસ્ટમાંથી બેસ્ટ’ અને ‘માટીકામ’ સ્પર્ધા યોજાઈ

ભાવિ શિક્ષકોમાં સર્જનાત્મકતા અને પર્યાવરણ જાગૃતિ વધે તેવા હેતુથી સુંદર આયોજન 

          વનવાસી સેવા સમાજ ટ્રસ્ટ, પાવીજેતપુર સંચાલિત આરાધના પી.ટી.સી. (ડી.એલ.એડ.) કોલેજ ખાતે તાજેતરમાં તાલીમાર્થીઓના કૌશલ્યવર્ધન અને આંતરિક શક્તિઓને પ્રોત્સાહન આપવા માટે ‘વેસ્ટમાંથી બેસ્ટ’ અને ‘માટીકામ’ સ્પર્ધાનું ભવ્ય આયોજન કરવામાં આવ્યું હતું.

         આ કાર્યક્રમનો મુખ્ય હેતુ ભવિષ્યના શિક્ષકોમાં કલા-કૌશલ્ય ખીલવવાની સાથે પર્યાવરણ પ્રત્યેની જવાબદારી સમજાવવાનો હતો. સ્પર્ધા દરમિયાન તાલીમાર્થીઓએ અદભૂત મૌલિકતા અને કલાશક્તિનું પ્રદર્શન કર્યું હતું. ‘વેસ્ટમાંથી બેસ્ટ’ સ્પર્ધામાં તાલીમાર્થીઓએ પ્લાસ્ટિકની બોટલો, જૂના નકામા કાગળો, પૂંઠા અને અન્ય નકામી ચીજવસ્તુઓનો કુશળતાપૂર્વક ઉપયોગ કર્યો હતો. જેમાંથી તેઓએ આકર્ષક ઘર સુશોભનની વસ્તુઓ, પેન-સ્ટેન્ડ અને પ્રાથમિક શાળાના બાળકોને ઉપયોગી થાય તેવા શૈક્ષણિક રમકડાં તૈયાર કર્યા હતા.

         માટીકામ સ્પર્ધામાં પ્રકૃતિ સાથેના જોડાણને પ્રાધાન્ય આપવામાં આવ્યું હતું. તાલીમાર્થીઓએ માટીમાંથી વિવિધ પશુ-પક્ષીઓ, પરંપરાગત વાસણો અને મનમોહક કલાત્મક નમૂનાઓ કંડારીને ઉપસ્થિત સૌના મન મોહી લીધા હતા.

        સમગ્ર સ્પર્ધાનું આયોજન કોલેજના પ્રિન્સિપાલ તેમજ સ્ટાફગણના સીધા માર્ગદર્શન હેઠળ કરવામાં આવ્યું હતું. પ્રિન્સિપાલ પટેલે પોતાના પ્રાસંગિક ઉદ્બોધનમાં જણાવ્યું હતું કે, આવા કૌશલ્યો ભાવિ શિક્ષકોને વર્ગખંડમાં શૈક્ષણિક કાર્યને રસપ્રદ બનાવવા માટે ખૂબ જ ઉપયોગી સાબિત થશે.

આ સ્પર્ધામાં તમામ તાલીમાર્થીઓએ ભારે ઉત્સાહ સાથે ભાગ લીધો હતો. આ પ્રવૃત્તિ દ્વારા તેઓમાં ટીમ વર્ક, સર્જનાત્મકતા અને શ્રમનું મૂલ્ય સમજાયું હતું. કાર્યક્રમના અંતે શ્રેષ્ઠ પ્રદર્શન કરનાર તાલીમાર્થીઓને બિરદાવી પ્રોત્સાહિત કરવામાં આવ્યા હતા.