પાવીજેતપુર તાલુકાના કરાલી પોલીસે ૧૧ વર્ષથી નાસતો ફરતો બાઇક ચોર મધ્યપ્રદેશથી ઝડપયો
છોટાઉદેપુર જિલ્લાની કરાલી પોલીસે બાતમીના આધારે ઓપરેશન પાર પાડીને વર્ષ ૨૦૧૫થી મોટર સાયકલ ચોરીના ગુનામાં નાસતા ફરતા રીઢા આરોપીને મધ્યપ્રદેશના અલીરાજપુર ખાતેથી ઝડપી પાડ્યો છે. આરોપી છેલ્લા ૧૧ વર્ષથી પોલીસને થાપ આપી રહ્યો હતો.
ઉચ્ચ અધિકારીઓ દ્વારા ટીમો કાર્યરત કરી નાસતા ફરતા આરોપીઓને પકડવા ખાસ ઝુંબેશ ચલાવવાની સૂચના આપવામાં આવી હતી. જેના ભાગરૂપે કરાલી પોલીસ સ્ટેશનના ઇન્ચાર્જ પી.આઈ. શ્રી ડી.કે. પંડ્યાના માર્ગદર્શન હેઠળ એક સ્પેશિયલ ટીમ બનાવવામાં આવી હતી.
પાવીજેતપુર તાલુકાની કરાલી પોલીસને સચોટ બાતમી મળી હતી કે કરાલી પો.સ્ટે.ના વર્ષ ૨૦૧૫ના ગુના (IPC કલમ ૩૭૯) નો આરોપી સચીનભાઇ જુગલીયાભાઇ ચૌહાણ (ચૌંગડ), રહે. સુમન્યાવાંટ, તા. કઠીવાડા, જી. અલીરાજપુર (મધ્યપ્રદેશ), જે કોઈ કામસર અલીરાજપુર કોર્ટ ખાતે આવવાનો છે.
બાતમી મળતા જ કરાલી પોલીસની ટીમ તાત્કાલિક મધ્યપ્રદેશ રવાના થઈ હતી. ત્યાંની સ્થાનિક કોતવાલી પોલીસની મદદ મેળવી, વોચ ગોઠવીને આરોપી સચીન ચૌહાણને કોર્ટ પરિસરની બહારથી જ દબોચી લેવામાં આવ્યો હતો. આરોપી ૨૦૧૫થી ધરપકડ ટાળવા માટે નાસતો ફરતો હતો. લાંબા સમય બાદ આ વોન્ટેડ આરોપી ઝડપાતા કરાલી પોલીસને મોટી સફળતા મળી છે. હાલ આરોપી વિરુદ્ધ આગળની કાયદેસરની કાર્યવાહી હાથ ધરવામાં આવી છે.
