শিৱসাগৰ নগৰৰ প্ৰতিষ্ঠিত ব্যৱসায়ী প্ৰিয়ম চৌধুৰী(জিতু)ৰ বিয়োগত শোকস্তব্ধ শিৱসাগৰবাসী ৷ শিৱসাগৰৰ এগৰাকী শুৱালকুছি পাট-মুগা কাপোৰৰ প্ৰতিষ্ঠিত ব্যৱসায়ী তথা সমাজকৰ্মী প্ৰিয়ম চৌধুৰী ওৰফে জিতু (৫৬)ৰ যোৱা ২২ ফেব্ৰুৱাৰীৰ নিশা গুৱাহাটীৰ এখন ব্যক্তিগত চিকিৎসালয়ত বিয়োগ ঘটে। প্ৰিয়ম চৌধুৰীৰ বিয়োগত শিৱসাগৰ নগৰত শোকৰ ছাঁ পৰিছে ৷ দীৰ্ঘদিন ধৰি শুৱালকুছিৰ পাট-মুগা কাপোৰৰ ব্যৱসায়ৰ সৈতে ওতপ্ৰোতভাৱে জড়িত আছিল প্ৰিয়ম ওৰফে জিতু চৌধুৰী ৷ শিৱসাগৰৰ ক্ৰমে ’কল্পতৰু চিল্ক হাউচ’, মা-মোহিনী চিল্ক হাউচ’ আৰু 'মোহিনী চিল্ক হাউচ'ৰ স্বত্বাধিকাৰী প্ৰিয়ম চৌধুৰীৰ নশ্বৰ দেহ ২৪ ফেব্ৰুৱাৰীৰ পুৱা শিৱসাগৰৰ বেজবৰুৱা চুকৰ দীনা নাথ বেজবৰুৱা পথলৈ অনাৰ পিছত অগণন গুণমুগ্ধৰ তেওঁৰ বাসভৱনলৈ সোঁত বয়। শিৱসাগৰৰ আগশাৰীৰ স্বেচ্ছাসেৱী অনুষ্ঠান "ঐক্য" প্ৰতিষ্ঠাপক সদস্য জিতু চৌধুৰী শিৱসাগৰৰ সমাজ জীৱনৰ এটি চিনাকি নাম আছিল। শিৱসাগৰৰ সামাজিক ও সাংস্কৃতিক অনুষ্ঠান "সমন্বয় সাংস্কৃতিক গোষ্ঠী"ৰ সভাপতি জিতেন কাকতিয়ে প্ৰিয়ম চৌধুৰীৰ বিয়োগত গভীৰ শোক প্ৰকাশ কৰিছে ৷ অমায়িক স্বভাৱৰ জনপ্ৰিয় ব্যক্তিগৰাকীৰ অকাল বিয়োগত শোক প্ৰকাশ কৰি শিৱসাগৰ নগৰৰ মুক্তিনাথ চাৰিআলিৰ ব্যৱসায়িক প্ৰতিষ্ঠানসমূহ বন্ধ ৰখা হয়৷ মৃত্যুৰ সময়ত তেওঁ পত্নীৰ উপৰি দুগৰাকী জীয়ৰীসহ বহু আত্মীয় স্বজনক ইহ সংসাৰত এৰি থৈ যায়। ২৩ ফেব্ৰুৱাৰী বিয়লি ৩ বজাত তেখেতৰ বাসভৱনত পৰা গুণমুগ্ধসকলে মৌন সমদলেৰে তেওঁৰ নশ্বৰ দেহ স্বেচ্ছাসেৱী অনুষ্ঠান ঐক্যৰ কাৰ্যালয়ৰ সন্মুখলৈ অনাৰ পাছত সতীৰ্থসকলৰ লগতে শিৱসাগৰৰ বৰ্ডিং ৰোড ব্যৱসায়ী সন্থা, শিৱসাগৰ সন্মিলিত দ’লমুখ চাৰিআলি ব্যৱসায়ী সন্থা, বস্ত্ৰ ব্যৱসায়ী সন্থা, শিৱসাগৰ জিলা ক্ৰীড়া সন্থাকে ধৰি বহু অনুষ্ঠানৰ বিষয়ববীয়াই প্ৰিয়ম চৌধুৰীৰ নশ্বৰ দেহত শ্ৰদ্ধাঞ্জলি জ্ঞাপন কৰে। আনহাতে প্ৰিয়ম চৌধুৰীৰ বিয়োগত বৃহত্তৰ শিৱসাগৰ প্ৰেছ ক্লাব, "সাধাৰণ জাতি সুৰক্ষা সন্মিলন-অসম" কেন্দ্ৰীয় সমিতিৰ সভাপতি ক্ষীৰোদ কুমাৰ বৰদলৈয়ে গভীৰ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে ৷
