শিৱসাগৰঃ শিৱসাগৰ জিলাৰ অভিভাৱক মন্ত্ৰী ড০ ৰণোজ পেগুৱে শিৱসাগৰ অসামৰিক চিকিৎসালয় পৰিদৰ্শন কৰাৰ লগতে শিশু আৰু মাতৃসেৱা কোষৰ নৱনিৰ্মিত ভৱনটি যোৱা শনিবাৰে উদ্বোধন কৰে ৷ প্ৰসূতি বিভাগ ৰাজ্যৰ শিক্ষা (উচ্চ, মাধ্যমিক আৰু প্ৰাথমিক), ভৈয়াম জনজাতি আৰু পিছপৰা শ্ৰেণীৰ কল্যাণ তথা শিৱসাগৰ জিলাৰ অভিভাৱক মন্ত্ৰী ড০ ৰণোজ পেগুৱে দিনৰ ২ বজাত জয়সাগৰস্থিত শিৱসাগৰ অসামৰিক চিকিৎসালয় পৰিদৰ্শন কৰে। পৰিদৰ্শনৰ সময়ত তেওঁ চিকিৎসালয়খনৰ ব্যৱস্থা-পৰিচালনা, স্বাস্থ্যসেৱা আৰু বিভিন্ন চিকিৎসা সৰঞ্জামৰ অৱস্থা খুঁটিনাটি মাৰি পৰ্যালোচনা কৰে। উল্লেখ যে, অভিভাৱক মন্ত্ৰীগৰাকীয়ে শিৱসাগৰ অসামৰিক চিকিৎসালয়ৰ চৌহদত নতুনকৈ নিৰ্মিত প্ৰসূতি আৰু শিশু স্বাস্থ্যসেৱা কোষ(MCH)ত প্ৰসূতি কক্ষটো উদ্বোধন কৰে। উক্ত কক্ষটো আগৰ ভৱনটোৰ পৰা স্থানান্তৰ কৰি নতুন ভৱনত স্থাপন কৰা হৈছে, তাত মাতৃ আৰু শিশুৰ বাবে উন্নত চিকিৎসাসেৱা উপলব্ধ হ’ব বুলি জানিব পৰা গৈছে ৷ অভিভাৱক মন্ত্ৰীগৰাকীয়ে চিকিৎসক, চিকিৎসাকৰ্মী আৰু কৰ্মচাৰীসকলৰ সৈতে মত-বিনিময় কৰি স্বাস্থ্যসেৱাৰ গুণগত মান উন্নত কৰাৰ দিশে বিশেষ গুৰুত্ব আৰোপ কৰে ৷ লগতে অসুস্থসকলৰ প্ৰতি যত্নশীল আৰু সজাগ মনোভাৱৰ সৈতে সেৱা আগবঢ়াবলৈ তেওঁ সকলো কৰ্মচাৰীক আহ্বান জনায়। আনহাতে মন্ত্ৰীগৰাকীয়ে চৰকাৰে স্বাস্থ্য খণ্ডৰ বিকাশ আৰু চিকিৎসাসেৱা সহজলভ্য কৰিবলৈ গৃহীত পদক্ষেপসমূহৰ বিষয়ে উল্লেখ কৰাৰ লগতে আগন্তুক দিনতো শিৱসাগৰ অসামৰিক চিকিৎসালয়ৰ উন্নয়নৰ বাবে অসম চৰকাৰৰ তৰফৰ পৰা সকলোধৰণৰ সহায় আগবঢ়াব বুলি আশ্বাস প্ৰদান কৰে। আনফালে শিৱসাগৰ অসামৰিক চিকিৎসালয়খন উন্নতমানৰ কৰি তুলিবলৈ অভিভাৱক মন্ত্ৰীগৰাকী কিমানদূৰ সফল হয় সেইয়া আগন্তুক সময়ত লক্ষণীয় হ’ব ৷