শিৱসাগৰঃ শিৱসাগৰ জিলাৰ আয়ুক্ত আয়ুস গৰ্গে ২২ মে’ত গেলেকী খণ্ড প্ৰাথমিক স্বাস্থ্য কেন্দ্ৰ আৰু কৰ্মশ্ৰী হিতেশ্বৰ শইকীয়া SDCH, লিগিৰীপুখুৰী স্বাস্থ্য প্ৰতিষ্ঠান পৰিদৰ্শনৰ লগতে বিষাক্ত কাঠফুলা সেৱন কৰি আক্ৰান্ত হোৱা লোকৰ স্বাস্থ্যৰ বুজ লয় ৷ শিৱসাগৰৰ জিলা আয়ুক্ত আয়ুস গৰ্গ এ গেলেকী খণ্ড প্ৰাথমিক স্বাস্থ্য কেন্দ্ৰত উপস্থিত হৈ চিকিৎসালয়খন পৰিদৰ্শন কৰে। বিশেষভাৱে আয়ুক্তগৰাকীয়ে চিকিৎসালয়খনৰ OPD, পৰীক্ষাগাৰ, শিশু বৰ্হি:বিভাগ, প্ৰসূতি তথা মাতৃ কক্ষৰ লগতে চিকিৎসালয়ৰ পৰিচ্ছন্নতা আদি দিশসমূহ পৰ্যবেক্ষণ কৰাৰ পিছত কৰ্মশ্ৰী হিতেশ্বৰ শইকীয়া SDCH, লিগিৰীপুখুৰী স্বাস্থ্য প্ৰতিষ্ঠান পৰিদৰ্শন কৰে। আনহাতে তেওঁ ইতিমধ্যে আন্তঃগাঁথনি সম্পূৰ্ণ হৈ উঠা ডায়েলাইছিছ ইউনিটটো পৰ্যবেক্ষণ কৰে। আঠখেল আৰু বাঁহগৰা অঞ্চলৰ বিষাক্ত কাঠফুলা সেৱন কৰি আক্ৰান্ত হোৱা তিনিগৰাকী ব্যক্তিৰ স্বাস্থ্যৰ বুজ লয়। ইতিমধ্যে আটাইকেইজন ব্যক্তি সুস্থ হৈ উঠিছে বুলি জানিব পৰা গৈছে। লগতে জিলা আয়ুক্ত গৰ্গে স্বাস্থ্য প্ৰতিষ্ঠান দুটাত উপস্থিত থকা ৰোগীসকলৰ লগত মত বিনিময় কৰে। তেওঁৰ এই পৰিদৰ্শন কালত জিলা স্বাস্থ্য বিভাগৰ অতিৰিক্ত আয়ুক্ত মীনাক্ষী পাৰ্মে আৰু জিলা স্বাস্থ্য বিভাগৰ যুটীয়া স্বাস্থ্যসেৱা সঞ্চালক ডাঃ মাখন কলিতা, নাজিৰা মহকুমাৰ মুখ্য কাৰ্যালয়ৰ মহকুমা স্বাস্থ্য বিষয়া ডাঃ সাধন বৰা, ডাঃ সৌভিক ভট্টাচাৰ্যয়ে সংগ দিয়ে। কৰ্মশ্ৰী হিতেশ্বৰ শইকীয়া SDCH, লিগিৰীপুখুৰী স্বাস্থ্য প্ৰতিষ্ঠানটোৰ উপ-অধীক্ষক ডাঃ কোকিল গগৈ আৰু গেলকী খণ্ড প্ৰাথমিক স্বাস্থ্য কেন্দ্ৰৰ মহকুমা স্বাস্থ্য বিষয়া ডাঃ প্ৰদ্যুৎ কোঁৱৰক সাক্ষাৎ কৰি স্বাস্থ্য প্ৰতিষ্ঠান দুটাৰ বিভিন্ন দিশ সম্পৰ্কে বিতং পৰ্যালোচনা কৰি প্ৰয়োজনীয় পৰামৰ্শ আগবঢ়ায় ।