ડીસાના રાણપુર રોડ પર ભૂગર્ભ ગટરના કામમાં કોન્ટ્રાક્ટરની બેદરકારીએ ગંભીર સમસ્યા સર્જી છે. ખોદકામ બાદ યોગ્ય રીતે પુરાણ ન થવાથી રસ્તા પર મોટા ખાડા પડ્યા છે.

આ માર્ગ પર 20 થી વધુ કોલ્ડ સ્ટોરેજ આવેલા છે. બટાકાની સિઝન હોવાથી દિવસ-રાત ટ્રેક્ટરોની અવર-જવર રહે છે. છેલ્લા ત્રણ દિવસમાં બટાકા ભરેલા ત્રણથી વધુ ટ્રેક્ટરો ખાડામાં ફસાઇને પલ્ટી ગયા છે.

આ સમસ્યાથી ખેડૂતોને આર્થિક નુકશાન થઇ રહ્યું છે. વારંવાર ટ્રાફીકજામની સ્થિતિ સર્જાય છે. અગાઉ રસ્તાની એક તરફ નખાયેલી પાઇપલાઇનનું પણ યોગ્ય પુરાણ થયું નથી. હવે બીજી તરફના ખોદકામમાં પણ આવી જ બેદરકારી જોવા મળી રહી છે.

ગુજરાત અર્બન ડેવલપમેન્ટ કોર્પોરેશન (GUDC) ના આ પ્રોજેક્ટમાં નગરપાલિકા પણ કોઇ કાર્યવાહી કરતી નથી. સ્થાનિક રહીશો અને ખેડૂતોએ બંને સંસ્થાઓને તાત્કાલિક ઉકેલ માટે રજૂઆત કરી છે.