બનાસકાંઠા જીલ્લો રાજસ્થાનની સરહદને અડીને આવેલો જીલ્લો છે. આ જીલ્લામાંથી ગેરકાયદેસર રીતે વિદેશી દારૂની હેરાફેરી થતી હોવાની ઘટનાઓ સામે આવી રહી છે. શનિવારે વધુ એક ઘટનામાં બનાસકાંઠા એલ.સી.બી. પોલીસે ડીસાના ચત્રાલા નજીકથી ગેરકાયદેસર વિદેશી દારૂ ભરેલા જીપડાલાને ઝડપી દારૂ સહીત રૂ. 5.77 લાખ ઉપરાંતનો મુદ્દામાલ જપ્ત કર્યો હતો.જોકે, જીપડાલા ચાલક ફરાર થઇ ગયો હતો.

બનાસકાંઠા જીલ્લો રાજસ્થાનથી ગુજરાતમાં પ્રવેશ કરવાનો પ્રવેશદ્વાર છે અને તેના લીધે આ જીલ્લામાંથી વિદેશી દારૂની ખૂબ જ મોટા પ્રમાણમાં હેરાફેરી થઇ રહી છે. ડીસા તાલુકાના ચત્રાલાથી રાણપુર તરફ એક દારૂ ભરેલી ગાડી આવી રહી હોવાની બાતમી એલ.સી.બી. પોલીસને મળી હતી. જેથી ચત્રાલા ગામ નજીક બનાસકાઠા એલ.સી.બી. પી.આઇ. એ. વી. દેસાઇની સૂચનાથી એલ.સી.બી. ટીમે નાકાબંધી ગોઠવી હતી.

ત્યારે પોલીસે પસાર જીપડાલાને અટકાવતાં તેનો ચાલક ડાલું મૂકી નાસી છૂટ્યો હતો. પોલીસે જીપડાલાની તપાસ લેતાં તેમાં 1523 બોટલ વિદેશી દારૂ અને બિયર મળી આવ્યો હતો. જેની કિંમત રૂ.2,77,860 છે. પોલીસે આ ઘટનામાં દારૂ સહીત રૂ. 3 લાખનું જીપડાલું મળી કુલ રૂ.5,77,860 નો મુદ્દામાલ જપ્ત કર્યા બાદ કાયદેસરની કાર્યવાહી કરી વધુ તપાસ હાથ ધરી છે.