પ્રિવેન્શન ઓફ મની લોન્ડરિંગ એક્ટ હેઠળ, EDએ ગેરકાયદેસર કમાણીમાંથી બનેલી 1,04,702 કરોડની સંપત્તિ જપ્ત કરી છે. મની લોન્ડરિંગ વિરુદ્ધ ED દ્વારા લેવામાં આવેલી કાર્યવાહીનો અંદાજ એ વાત પરથી લગાવી શકાય છે કે છેલ્લા ચાર વર્ષમાં એક વર્ષમાં નોંધાયેલા કેસોની સંખ્યામાં છ ગણો વધારો થયો છે. 2018-19માં, EDએ મની લોન્ડરિંગના માત્ર 195 કેસોની તપાસ કરી હતી, જે 2021-22 સુધીમાં વધીને 1180 થઈ ગઈ હતી.
EDના વરિષ્ઠ અધિકારીના જણાવ્યા અનુસાર, 2012-13થી અત્યાર સુધીમાં મની લોન્ડરિંગ હેઠળ કુલ 3985 કેસ નોંધાયા છે. જ્યારે છેલ્લા પાંચ વર્ષમાં નોંધાયેલા કેસોમાં તેજી વિશે પૂછવામાં આવ્યું ત્યારે તેમણે કહ્યું કે FATF (ફાઇનાન્સિયલ એક્શન ટાસ્ક ફોર્સ) માર્ગદર્શિકાના અમલીકરણને કારણે આવું થઈ રહ્યું છે.
તેમના જણાવ્યા અનુસાર, પહેલા ED પોતાની રીતે કેસ નોંધતું હતું, પરંતુ હવે FATFના જોખમ આધારિત પસંદગી માર્ગદર્શિકા હેઠળ આવતા તમામ કેસ નોંધવામાં આવી રહ્યા છે. તેમણે કહ્યું કે આવનારા સમયમાં FATF ભારતમાં મની લોન્ડરિંગ વિરુદ્ધ કરવામાં આવેલી કાર્યવાહીની સમીક્ષા કરશે.
આ જ કારણ છે કે FATF ગાઈડલાઈન્સનો કડકાઈથી અમલ કરવામાં આવી રહ્યો છે. ફોરેન એક્સચેન્જ મેનેજમેન્ટ એક્ટ (FEMA) હેઠળની કાર્યવાહીએ પણ છેલ્લા કેટલાક વર્ષોમાં વેગ પકડ્યો છે. 2018-19માં ફેમા હેઠળ કુલ 2659 કેસ નોંધાયા હતા, જ્યારે 2021-22માં જ 5313 કેસ નોંધાયા હતા.
2012-13 થી 2022 સુધીમાં, ED એ FEMA હેઠળ 24,893 કેસ નોંધ્યા છે. આ કેસોમાંથી 8109 કેસોમાં કારણ બતાવો નોટિસ જારી કરવામાં આવી છે જેમાંથી 6472 કેસમાં તેનો અમલ કરવામાં આવ્યો છે. આ અંતર્ગત કુલ 8,130 કરોડનો દંડ ફટકારવામાં આવ્યો છે અને 7080 કરોડની સંપત્તિ જપ્ત કરવામાં આવી છે.
