અમીરગઢ બોર્ડર ચેકપોસ્ટે પોલીસે રાજસ્થાન રોડવેઝની બસમાંથી રૂ. 58.40 લાખના મેફેડ્રોન ડ્રગ્સ સાથે એક શખ્સને ઝડપી લીધો હતો. આ અંગે ડ્રગ્સ મંગાવનારા પાલનપુરના શખ્સ સહિત બંને સામે ગૂનો નોંધી પોલીસે વધુ તપાસ હાથ ધરી હતી.

અમીરગઢ પોલીસની ટીમ ચેકપોસ્ટે વાહન ચેકીંગમાં હતી. દરમિયાન રાજસ્થાન રોડવેઝની બસ નં. આર. જે. 19. પી.સી. 3906 માં તપાસ કરી હતી. જ્યાં ડ્રાઇવર સીટની પાછળની સીટમાં બેઠેલો રાજસ્થાનના ચિત્તોડગઢનો અરશદખાન અનવરહુસેન પઠાણની તલાસી લેતાં તેના ખિસ્સામાંથી રૂ. 58,40,000નું મેફેડ્રોન મળી આવ્યું હતું.

જેની પાસેથી રૂ. 5,000 નો મોબાઇલ ફોન, રૂ. 500 રોકડા મળી કુલ રૂ. 58,45,500 નો મુદ્દામાલ કબ્જે લેવામાં આવ્યો હતો. તેમજ ડ્રગ્સ મંગાવનારો પાલનપુરનો વિજયભાઇ અને જથ્થો આપનારા શખ્સ સામે ગૂનો નોંધી વધુ તપાસ હાથ ધરી હતી.