ડીસા શહેરના ઉમિયાનગર વિસ્તારમાં બુધવારે કેટલાંક શખ્સો કાર અને ઇકોમાં ધોકા લઇ એક યુવક ઉપર હુમલો કર્યો હતો. આમ આતંક મચાવતો વિડીયો વાયરલ થતાં ડીસા શહેર દક્ષિણ પોલીસે તાત્કાલિક અસરથી વીડિયોમાં દેખાતા શખ્સોની ઓળખ કરી રાયોટીંગનો ગુનો દાખલ કર્યો હતો. પોલીસે આ મામલે બંને પક્ષે સામસામે ફરિયાદ નોંધી છે. 

ડીસા શહેરના ઉમિયાનગરથી વિરેન પાર્ક તરફ જતા રસ્તા પર બુધવારે કેટલાક શખ્સો ગાડીમાં લાકડીઓ, ધોકાઓ સાથે આવીને જાહેરમાં દાદાગીરી કરી રહ્યા હોવાનો વિડીયો વાયરલ થયો હતો. જે બાબતે પોલીસે તપાસ કરતા ડીસા કોલેજ પાછળ આસોપાલવ ભાગ- 2 માં રહેતા અને રિક્ષા ચલાવી પરિવારનું ગુજરાન ચલાવતા વસંત ઈશ્વરલાલ પાવાળા પોતાના દીકરાને શાળાએથી મૂકીને ઘરે આવતા હતા. ત્યારે દાંતીવાડા તાલુકાના ભાખર ગામના મોનસિંહ ઉર્ફે મોનભા અંદરસિંહ વાઘેલા, જીતુસિંહ ઉર્ફે જીતુભા વાઘેલા, દાડમસિંહ વાઘેલા, કલ્પેશસિંહ લાખુસિંહ વાઘેલા, પીરસિંગ લાખુસિંહ વાઘેલા, સુરંગસિંહ વાઘેલા તથા બીજા ત્રણ -ચાર શખ્સો કાર અને ઈકો ગાડીમાં આવીને વસંતને તું કેમ ગોવિંદ રાણા સાથે ખૂબ ફરે છે તેમ કહી ધોકા વડે માર મારતા વસંતને માથાના ભાગે ગંભીર ઈજા થઈ હતી.

જોકે, તે દરમિયાન લોકોનું ટોળુ એકત્ર થઈ જતા તમામ શખ્સો ગાડીમાં બેસીને નાસી છૂટ્યા હતા. જોકે, ત્યાં ઉભેલા લોકોમાંથી કોઈએ તેનો વિડીયો બનાવી વાયરલ કરી દીધો હતો. જેથી પોલીસે વસંત ઈશ્વરલાલ પાવાળાની ફરિયાદના આધારે તમામ સામે રાયોટીંગનો ગુનો નોંધ્યો છે. જ્યારે સામે પક્ષે પોલીસે લખુસિંગ ડુંગરસિંહ વાઘેલાની ફરિયાદના આધારે ગોવિંદ રાણાજી જોશી, પંકજ ગોવિંદ જોશી તેમજ અજાણ્યા શખ્સો સામે ફરિયાદ નોંધી છે.

 જેમાં જણાવ્યું છે કે, લખુંસિંગનો ભત્રીજો માનસિંગ ઉર્ફે માનભા ગાડી રીપેર કરાવવા ડીસા આવ્યો હતો ત્યારે પંકજ જોશીને મજાકમાં કહેલ કે તમે લોકો માથાભારે થઈ ગયા છે આટલું કહેતા પંકજ જોશી, ગોવિંદ જોશી તેમજ તેમની સાથેના અન્ય શખ્સોએ તેની પર હૂમલો કરી હાથે ફ્રેક્ચર કરી ઇજા પહોંચાડી. પોલીસે આ બાબતે પણ ગુનો નોંધ્યો છે.