যোৰহাট জিলা প্ৰশাসনে আজি যোৰহাট থিয়েটাৰ হলত আয়োজন কৰা বিভাজন বিভীষিকা স্মৃতি দিৱসত অসম চৰকাৰৰ বিত্ত, মহিলা আৰু শিশু বিকাশ আদি বিভাগৰ মন্ত্ৰী অজন্তা নেওগে মুখ্য অতিথি হিচাপে অংশগ্ৰহণ কৰে৷ বন্তি প্ৰজ্বলন কৰি মন্ত্ৰীগৰাকীয়ে অনুষ্ঠানটোৰ শুভাৰম্ভ কৰে৷ ১৯৪৭ চনৰ দেশ বিভাজনৰ বিভীষিকাময় পৰিস্থিতিত মৃত্যুবৰণ কৰা আৰু নিজৰ শিপাৰ পৰা বিচ্ছিন্ন হৈ পৰা লোকসকলৰ স্মৃতি সোঁৱৰি পালন কৰা উক্ত দিৱসৰ অনুষ্ঠানত আদৰণি ভাষণ প্ৰদান কৰে জিলা উপায়ুক্ত অশোক কুমাৰ বৰ্মনে৷ অনুষ্ঠানত সৰ্বধৰ্ম প্ৰাৰ্থনাৰ এক কাৰ্যসূচীও অনুষ্ঠিত হয়৷ উক্ত অনুষ্ঠানত বিদ্যালয়ৰ ছাত্ৰ ছাত্ৰীসকলৰ উপস্থিতিত যোৰহাট কলেজৰ বুৰঞ্জী বিভাগৰ মুৰব্বী অধ্যাপক সৌমিত্ৰ পূজাৰীয়ে সভ্যতা সংস্কৃতিত চহকী ভাৰতবৰ্ষক বিট্ৰিছে দ্বিখণ্ডিত কৰি বিভাজন কৰা পৰিস্থিতিৰ বিষয়ে বিষদভাৱে বৰ্ণনা কৰি ভাষণ প্ৰদান কৰে৷