মাজুলী জিলাৰ অতি গুৰুত্বপূৰ্ণ নামনি বৰবিল - পানীখাতী সংযোগী পথত থকা চিগা অংশত বিগত পোন্ধৰ বছৰে নিৰ্মাণ নহ'ল এখন স্থায়ী দলং । উল্লেখ্য যে ২০০৭ চনৰ প্ৰলয়ংকৰী বানে উক্ত পথটোৰ ৩০ মিটাৰ মান উটুৱাই নিয়াত যাতায়ত ব্যৱস্থা ব্যাহত হৈ পৰে । ২০২০ চনত উক্ত পথটো প্ৰধানমন্ত্ৰী গ্ৰাম চড়ক যোজনাৰ অধীনত নিৰ্মাণ কৰা হয় যদিও ৰহস্যজনক কাৰণত আজিকোপতি চিগা অংশ উন্মুক্ত হৈ থাকিল । উক্ত পথটোৰে অঞ্চলৰ জনসাধাৰণে বছৰৰ প্ৰায় চাৰি মাহ বাঁহৰ দলঙেৰে যাতায়ত কৰিব লগা হয় । অন্যহাতে বাঁহৰ দলং নিৰ্মান কৰাৰ নামত প্ৰতিবছৰে ৰাজকোষৰ লক্ষ্যাধিক টকা ব্যয় কৰি অহা হৈছে । ইফালে ঐতিহাসিক পানীখাতী শিলগুৰি থানখন পৰিদৰ্শন কৰাৰ বাবে দৈনিক দূৰ দূৰণিৰ পৰা বহু লোক এই পথেৰেই অহা যোৱা কৰে । তাৰোপৰি অঞ্চলটোৰ অন্যান্য লোক সকলৰ উপৰি কেইবাখনো বিদ্যালয়ৰ ছাত্ৰ ছাত্ৰী, শিক্ষক-কৰ্মচাৰীও অহা যোৱা কৰা নিৰ্ভৰযোগ্য পথ । সেই ফালৰ পৰাও পথটোৰ গুৰুত্ব আছে । সি যি কি নহওক নামনি বৰবিল- পানীখাতী সংযোগী পথৰ চিগা অংশত শীঘ্ৰে এখন স্বায়ী দলং নিৰ্মাণৰ যাৱতীয় ব্যবস্থা গ্ৰহণ কৰি ব্যাহত হৈ থকা যাতায়ত ব্যৱস্থা সুচল কৰাৰ বাবে মাজুলী সমষ্টিৰ বিধায়কক অঞ্চলটোৰ জনসাধাৰণে আহ্বান জনাইছে ।