ડીસાના જૂનાડીસાથી વાસણા જવાના રોડ પર બેફામ રીતે દોડતા ડમ્પર અને છકડો રીક્ષા વચ્ચે અકસ્માત સર્જાયો હતો. જેમાં છકડો રીક્ષા ચાલકનું ઘટનાસ્થળે મોત થયું હતું. જ્યારે છકડામાં સાથે બેઠેલા યુવકને ગંભીર ઇજા થતા સારવાર અર્થે ખસેડાયો હતો.

ડીસા તાલુકામાં અકસ્માતની ઘટનાઓ રોજેરોજ બની રહી છે. જેમાં આજે વધુ એક અકસ્માતમાં એક વ્યક્તિનું મોત જ્યારે એકને ઇજા થઇ હતી. બનાવની વિગત એવી છે કે, ડીસાના જૂનાડીસાથી વાસણા અને છત્રાલા ખાતે આવેલી બનાસ નદીમાંથી રેતી ભરીને બેફામ દોડતા ડમ્પર ચાલકે વાસણા રોડ પાસે સામેથી આવી રહેલી છકડો રીક્ષાને ધડાકાભેર ટક્કર મારી હતી. જેથી છકડો રીક્ષા પલટી ખાઈ જતા તેમાં બેઠેલા બંને યુવકો રોડ પર પટકાયા હતા. ટક્કર મારીને ડમ્પર ચાલક ફરાર થઈ ગયો હતો.

ઘટનામાં છકડો ચાલક વિપુલ નટવરભાઈ પટની (રહે. શિહોરી, તા. કાંકરેજ) નું ઘટનાસ્થળે મોત નિપજ્યું હતું. જ્યારે સાથે બેઠેલા પ્રકાશ બીજલભાઇ પટણીને ગંભીર ઇજાઓ થતા 108 ઈમરજન્સી વાન મારફત ડીસા સિવિલ હોસ્પિટલમાં સારવાર અર્થે ખસેડાયો હતો. જ્યારે મૃતક વિપુલ પટણીના મૃતદેહને પણ પી.એમ. અર્થે ડીસા લવાયો હતો. ઘટનાની જાણ થતા ડીસા તાલુકા પોલીસે ઘટનાસ્થળે પહોંચી પંચનામુ સહિતની કામગીરી કરી ફરાર થયેલા ડમ્પર ચાલક વિરુદ્ધ ગુનો નોંધવાની કાર્યવાહી હાથ ધરી હતી.