মাজুলীৰ অন্যতম উচ্চ শিক্ষানুষ্ঠান উজনি মাজুলী খেৰকটীয়া মহাবিদ্যালয়ত আজি ৰাষ্ট্ৰীয় গ্ৰন্থাগাৰিক দিৱস পালন কৰা হয়৷ ৰাষ্ট্ৰীয় গ্ৰন্থাগাৰিক দিৱসৰ লগত সংগতি ৰাখি মহাবিদ্যালয়খনৰ গ্ৰন্থাগাৰত মহাবিদ্যালয়ৰ সমূহ শিক্ষক-কৰ্মচাৰী, ছাত্ৰ একতা সভা, এনচিচি, এনএছএছৰ লগতে সমূহ ছাত্ৰ-ছাত্ৰীৰ উপস্থিতিত এখনি সভা অনুষ্ঠিত হয়৷ সভাখন আঁত ধৰি ড০ এছ আৰ ৰঙ্গানাথণৰ গ্ৰন্থৰ প্ৰচাৰ আৰু প্ৰকাশৰ ক্ষেত্ৰত তেখেতৰ ভূমিকা সম্পৰ্কে বিশদভাৱে বক্তব্য প্ৰদান কৰে গ্ৰন্থাগাৰিক টংকেশ্বৰ পাঠকে৷ সভাত মুখ্য বক্তা হিচাপে উপস্থিত থাকি মহ্যবিদ্যালয়খনৰ অধ্যক্ষ ড০ জাহ্নৱী লহকৰ বৰুৱাই গ্ৰন্থগাৰৰ ব্যৱহাৰ আৰু গ্ৰন্থগাৰিকৰ ভূমিকা সম্পৰ্কে বিষদভাৱে বক্তব্য আগবঢ়ায়৷ সভাত ছাত্ৰ একতা সভাৰ সাধাৰণ সম্পাদক পৱন দলেয়ে দিনটোৰ তাৎপৰ্য আৰু ছাত্ৰ-ছাত্ৰীসকলক ঐক্যসাজ পৰিধান কৰি মহাবিদ্যালয়ৰ নীতি-নিৰ্দেশনা পালন কৰিবলৈ আহ্বান জনায়৷ উক্ত সভাতে অধ্যক্ষ ড০ জাহ্নৱী লহকৰ বৰুৱাই কেইবাখনো মূল্যৱান গ্ৰন্থ গ্ৰন্থগাৰিকৰ হাতত অৰ্পণ কৰে৷