খাৰুপেটীয়াত ন বোৱাৰীক হত্যাৰ অভিযোগ উত্থাপিত হৈছে । উল্লেখ্য যে এবছৰ পূৰ্বে দৰঙৰ খাৰুপেটীয়া আৰক্ষী থানাৰ অন্তৰ্গত খগজানি গাঁৱৰ আব্দুল বাৰেকৰ পুত্ৰ নজৰুল হকৰ সৈতে দলগাওঁ আৰক্ষী থানাৰ বৰঙাবাৰী গাঁও ৰ আইনাল হকৰ কন্যা আলমিনা বেগমৰ লগত সামাজিক ভাৱে বিবাহ সম্পন্ন হয় । বিবাহ সম্পন্ন হোৱাৰ কিছুদিন পিছৰে পৰাই যৌতুক দাবী কৰি বোৱাৰী গৰাকীৰ ওপৰত শাৰীৰিক মানসিক নিৰ্যাতন চলাই আহিছিল স্বামীৰ পৰিয়ালে । চলিত মাহৰ ১৩ তাৰিখে যৌতুকৰ গইনা লৈ কাজিয়াৰ সৃষ্টি কৰি ন বোৱাৰী গৰাকীক স্বামীৰ পৰিয়ালে উপৰ্যুপৰি আক্ৰমণ কৰে আৰু হত্যাৰ চেষ্টাৰে মুখত বিষ ঢালি দিয়ে । গুৰুতৰ ভাৱে আহত বোৱাৰী গৰাকীক চিকিৎসাৰ বাবে মঙলদৈ অসামৰিক চিকিৎসালয়লৈ নিয়া হয় যদিও চিকিৎসকে উন্নত চিকিৎসাৰ বাবে জি এম চি এইচ লৈ প্ৰেৰণ কৰে । প্ৰায় এসপ্তাহ জি এম চি এইচৰ বিচনাত চটফটাই মৃত্যু বৰণ কৰে ন বোৱাৰী আলমিনা বেগম । ঘটনা সন্দৰ্ভত স্বামী নজৰুল হক , শহুৰ আব্দুল বাৰেক আৰু শাহুৰী নুৰ জাহানৰ বিৰুদ্ধে খাৰুপেটীয়া আৰক্ষী থানাত ৰুজু হৈছে গোচৰ । উক্ত গোচৰৰ ভিত্তিত স্বামী নজৰুল হকক ইতিমধ্যে আৰক্ষীয়ে জেললৈ প্ৰেৰণ কৰিছে যদিও বাকী অভিযুক্ত সকলক কৰাত্ত কৰিবলৈ আৰক্ষী প্ৰশাসনৰ ওচৰত দাবী জনাইছে বোৱাৰীৰ পিতৃ পৰিয়ালে ।