শিৱসাগৰঃ শিৱসাগৰত সদৌ অসম আমন্ত্ৰণমূলক প্ৰাইজমানি মহিলা ক্ৰিকেট প্ৰতিযোগিতা আৰম্ভ ৷ শিৱসাগৰৰ অন্যতম সামাজিক, সাংস্কৃতিক আৰু ক্ৰীড়াৰ অনুষ্ঠান 'গ্ৰীফন ক্লাব'ৰ উদ্যোগত ৫ ফেব্ৰুৱাৰীৰ পৰা শিৱসাগৰ উচ্চতৰ মাধ্যমিক বহুমুখী বিদ্যালয়ৰ ঐতিহাসিক বৰ্ডিং খেলপথাৰত অনুষ্ঠিত হৈছে "গ্ৰীফন চেলেঞ্জ ট্ৰফী" দ্বিতীয় সদৌ অসম আমন্ত্ৰণমূলক প্ৰাইজমানি মহিলা ক্ৰিকেট প্ৰতিযোগিতা ৷ অসমৰ ক্ৰীড়া জগতখনক অনন্য মাত্ৰা প্ৰদান কৰি অহা ঐতিহাসিক শিৱসাগৰত মহিলা ক্ৰিকেটৰ প্ৰচাৰ আৰু প্ৰসাৰৰ স্বাৰ্থত গ্ৰীফন ক্লাবৰ উদ্যোগত বিগত বৰ্ষৰ দৰে এইবাৰো অনুষ্ঠিত হোৱা মহিলা ক্ৰিকেট প্ৰতিযোগিতাখনি সোমবাৰে শুভ উদ্ধোধন কৰে শিৱসাগৰ জিলা আয়ুক্ত আদিত্য বিক্ৰম যাদৱে ৷ উল্লেখযোগ্য যে, গুৱাহাটী, মঙ্গলদৈ, গোৱালপাৰা, তেজপুৰ, যোৰহাট, গোলাঘাটকে ধৰি ৰাজ্যৰ কেইবাখনো জিলাই অংশগ্ৰহণ কৰা প্ৰতিযোগিতাখনিৰ কেউটা দিনতে ক্ৰীড়াপ্ৰেমী ৰাইজৰ উপস্থিতি উদ্যাপন সমিতিয়ে একান্তই কামনা কৰিছে ৷
