ডিব্ৰুগড় জিলা অপ্ৰাদেশীকৃত শিক্ষক কৰ্মচাৰী সন্থাৰ এখন সাধাৰণ সভা আজি মৰাণৰ বামুণবাৰী চাহ জনজাতি বালিকা উচ্চ মাধ্যমিক বিদ্যালয়ত সম্পন্ন হৈ যায় । সভাত ডিব্ৰুগড় জিলাৰ অপ্ৰাদেশীকৃত শিক্ষক কৰ্মচাৰী সকলৰ এখন পূৰ্ণাঙ্গ জিলা সমিতি গঠন কৰা হয় । সভাত সদৌ অসম অপ্ৰাদেশীকৃত শিক্ষক সন্থাৰ সম্পাদক হৰমোহন বৰা উপস্থিত থাকি ৰাজ্যত প্ৰায় ২৪ হাজাৰ অপ্ৰাদেশীকৃত শিক্ষকৰ বিষয়টো মুখ্যমন্ত্ৰীয়ে এৰাই চলিব বিচৰা কাৰ্যক সমালোচনা কৰে । লগতে শিক্ষক সকলৰ সৈতে আলোচনা কৰিম বুলি কোৱা কাৰ্য শীঘ্ৰে কাৰ্যকৰী কৰিবলৈ আহ্বান জনায় । আনহাতে অসম চৰকাৰে তৃতীয় শ্ৰেণীৰ পৰা গণিত আৰু বিজ্ঞান বিষয় দুটা ইংৰাজীত পাঠদান কৰিব বিচৰা সিদ্ধান্তক তীব্ৰ বিৰোধিতা কৰে সম্পাদক জনে । তেওঁ কয় যে মাতৃভাষাতো সদায় বাহাল ৰাখিব লাগে । তাৰ পৰিৱৰ্তে ইংৰাজী বিষয়তো প্ৰথম শ্ৰেণীৰ পৰা শিকোৱাৰ ব্যৱস্থা কৰিব লাগে বুলি মন্তব্য কৰে । আজি এই সভাৰ পৰাই অপ্ৰাদেশীকৃত শিক্ষক সকলৰ ১৪ টাকৈ দাবী সম্বলিত এখন পত্ৰও চৰকাৰলৈ আগবঢ়োৰ সিদ্ধান্ত গ্ৰহণ কৰে । উল্লেখযোগ্য যে এই সভাত ডিব্ৰুগড় জিলা প্ৰায় শতাধিক শিক্ষক কৰ্মচাৰীয়ে অংশগ্ৰহণ কৰে ।