যোৱা ৮ অক্টোবৰত গুৱাহাটী শ্ৰীমন্ত শংকৰদেৱ কলাক্ষেত্ৰত সাংস্কৃতিক মহাসভা, অসমে অনুষ্ঠিত কৰা এক বৰ্ণাঢ্য অনুষ্ঠানত অসমৰ ৰাজ্যপাল গোলাপ চান্দ কাটাৰীয়াৰ পৰা সাংস্কৃতিক ক্ষেত্ৰখনলৈ আগবঢ়োৱা অৱদানৰ বাবে সত্ৰনগৰী মাজুলী ফুলনি চাৰিআলিৰ বাসিন্দা, শ্ৰীৰাম বনমালীদেৱ উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ, অভিনেতা, নাট্যকাৰ শংকৰী সংস্কৃতিৰ সাধক দীনাৰাম বৰালৈ জীৱন জোৰা সাধনা বঁটা প্ৰদান কৰা হয় । শৈশৱৰে পৰা জিলাখনৰ বিভিন্ন প্ৰান্তৰ লগতে ফুলনি অঞ্চলত ৰাস, ভাওঁনা, অভিনয়ৰ লগত জড়িত হৈ মাজুলীৰ সাংস্কৃতিক জগতখনত বিশেষ সমাদৰ লাভ কৰিবলৈ সক্ষম হোৱাৰ লগতে পৰৱৰ্তী সময়ত তেখেতে শংকৰী কলা কৃষ্টি চৰ্চা কৰি কীৰ্ত্তন, ভাগৱত, বৰগীত, দিহানাম আদিত পাৰ্গত হৈ পৰে ।