ঢকুৱাখনা ব্লক কংগ্ৰেছ সমিতিৰ এজন নিষ্ঠাবান প্ৰবীণ কৰ্মী , বৃহত্তৰ আলিমুৰ ডাংধৰা গাঁওৰ এগৰাকী অগ্ৰণী সমাজ সংগঠক তথা ঢকুৱাখনা ব্লক কংগ্ৰেছৰ সাধাৰণ সম্পাদক ডিম্বেশ্বৰ পাতিৰ আৰু নাই । শুক্ৰবাৰৰ মাজ নিশা উচ্চ ৰক্তচাপ জনিত কাৰণত হৃদযন্ত্ৰৰ ক্ৰিয়া বন্ধহৈ নিশা প্ৰায় ১২ বজাত অকাল মৃত্যুক সাৱটি লয় মিষ্টভাষী ব্যক্তি পাতিৰে । আজীৱন কংগ্ৰেছ দলৰ হৈ নিষ্ঠাবান ৰাজনৈতিক সেৱা আগবঢ়াই অহা পাতিৰৰ মৃত্যুৰ সময়ত বয়স হৈছিল প্ৰায় ৫০ বছৰ । বিগত দুটা বছৰৰ ব্লক কংগ্ৰেছৰ সম্পাদক হিচাবে শলাগনীয় সাংঠনিক সেৱা আগবঢ়াই যোৱা নিঃস্বাৰ্থ কৰ্মী গৰাকীৰ অকাল বিয়োগত সমগ্ৰ অঞ্চলটোত শোকৰ ছাঁ পৰিছে । এগৰাকী অগ্ৰণী দলীয় সতীৰ্থক অকালতে হেৰুৱাই মৰ্মাহত ঢকুৱাখনা ব্লক কংগ্ৰেছ সমিতি । অসম প্ৰদেশ কংগ্ৰেছ সমিতিৰ সাধাৰণ সম্পাদক পদ্মলোচন দলে , নাওবৈছা বিধানসভা সমষ্টিৰ বিধায়ক ভৰত চন্দ্ৰ নৰহ , প্ৰাক্তন সাংসদ তথা প্ৰাক্তন কেন্দ্ৰীয় মন্ত্ৰী ডঃ ৰাণী নৰহ, ঢকুৱাখনা ব্লক কংগ্ৰেছৰ সম্পাদক শৰৎ পাতিৰ , ঘিলামৰা ব্লক কংগ্ৰেছৰ সভাপতি সুভাষ দিহিঙীয়া , ডাংধৰা মণ্ডল কংগ্ৰেছ সমিতি , ঢকুৱাখনা ব্লক মহিলা কংগ্ৰেছ সমিতি ,ঢকুৱাখনা ব্লক যুৱ কংগ্ৰেছ সমিতি , ঢকুৱাখনা ব্লক এন এছ ইউ আই সমিতি আদি বিভিন্ন ব্যক্তি, দল সংগঠনে পাতিৰৰ বিয়োগত গভীৰ শোক প্ৰকাশ কৰি মৃতকৰ আত্মাৰ সদগতি কামনা কৰিছে । দলৰ সতীৰ্থ পাতিৰক অকালতে হেৰুৱাই শোকাহত দলৰ নেতা কৰ্মী সকলে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে ।