વઢવાણ તાલુકાના દેદાદરા ગામ પાસે મોડી રાત્રે ટ્રકનું ટાયર બદલી રહેલા પંજાબના કલીનરનું ડમ્પર હડફેટે ઘટનાસ્થળે જ મોત નિપજેલ હોવાનું જાણવા મળે છે. જમ્મુ કાશ્મીરના ભૂષણકુમાર મહંત રામ શર્મા પોતાના હવાલાવાળી અશોક લેલન્ડ ટ્રકમાં અમૃતસરથી પ્લાસ્ટીક વેસ્ટનો માલ ભરીને કલીનર સૂરજીતસિંગ અનોખસીંગ જાટ રે.પંજાબ સાથે ઉપલેટા આવવા નીકળ્યા હતા. લખતર-વઢવાણ રોડ ઉપર દેદાદરા પાસે રાત્રે દોઢ વાગ્યાના સૂમારે ટ્રકમાં પંકચર પડતા કલીનર સૂરજીતસિંહ ટ્રકના બન્ને સાઈડના ઈન્ડીકેટર ચાલુ રાખીને ટાયર બદલી રહ્યા હતા. ત્યારે લખતર તરફથી પુર ઝડપે આવતા સફેદ કલરના ડમ્પરના ચાલકે તેમને હડફેટે લેતા દુર ફંગોળાયેલા સૂરજીતસિંહના ડાબા પગ ઉપર ડમ્પર ચડાવી દઈને માથામાં ગંભીર ઈજા કરતા સૂરજીતસિંગનું ઘટનાસ્થળે જ મોત નિપજેલ હતુ. આ અંગે ડ્રાયવર ભૂષણકુમારે લખતર પોલીસમાં ફરીયાદ નોંધાવેલ હતી ડમ્પર ચાલક ડમ્પર મુકીને નાસી ગયો હતો.